រថយន្ត BMW iX3 បានបង្ហាញមុខជាផ្លូវការ ដែលនេះគឺជារថយន្ត SUV អគ្គិសនីដំបូងរបស់ម៉ាកយីហោរថយន្តអាល្លឺម៉ង់។
BMW iX3 បានផលិតឡើងផ្អែកតាមរថយន្ត X3 ម៉ូដែលបច្ចុប្បន្ន ហើយមានបំពាក់ដោយប្រព័ន្ធ eDrive ជំនាន់ទីប្រាំ ដែលមានរួមបញ្ចូលនូវអាគុយទំហំ ៨០ kWh និងម៉ូទ័រអគ្គិសនីដែលមានកម្លាំង ២៨២សេះ។ BMW និយាយថារថយន្ត iX3 អាចជិះបានចម្ងាយដល់ ៤៦០គ.ម ពេលសាកភ្លើងពេញ។
កម្លាំងត្រូវបានបញ្ជូនទៅកាន់កង់រថយន្តខាងក្រោយ ដោយវាអាចឲ្យរថយន្តស្ទុះពី ០-១០០ គ.ម/ម៉ ក្នុងពេល ៦,៨វិនាទី និងមានល្បឿនអតិបរមាដែលកំណត់នៅត្រឹម ១៨០គ.ម/ម៉។
BMW iX3 មានគាំទ្រនូវដុំសាកល្បឿនលឿនកម្លាំង ១៥០ kW ដែលអាចសាកភ្លើងពី ០-៨០% ប្រើពេលត្រឹមតែ ៣៤នាទី។ សាកភ្លើង ១០នាទី ដោយប្រើដុំសាកល្បឿនលឿន អាចឲ្យរថយន្តនេះបើកបរបានដល់ចម្ងាយ ១០០គ.ម។
រថយន្ត BMW iX3 នេះគឺជារថយន្តអគ្គិសនីមួយ ក្នុងចំណោមរថយន្តអគ្គិសនីថ្មីបីម៉ូដែល ដែល BMW ត្រៀមប្រកាសចេញ ដែលពីរទៀតនឹងជា BMW i4 រួមជាមួយផលិតផលសម្រេចនៃរថយន្ត iNext ដែលពួកវាទាំងនឹងបង្ហាញមុខនៅមុនដំណាច់ឆ្នាំ ២០២១។
BMW iX3 នេះនឹងមានដាក់លក់នៅប្រទេសចិនចាប់ពីចុងឆ្នាំ ២០២០ នេះ ហើយនៅអឺរ៉ុបនឹងមានលក់នៅឆ្នាំ ២០២១។ រថយន្ត SUV អគ្គិសនីនឹងមិនមានលក់នៅអាមេរិកខាងជើងនោះទេ ដោយអតិថិជននៅអាមេរិកនឹងត្រូវរថយន្តវត្តមានរថយន្ត i4 និង iNext ជំនួសវិញ៕
