ក្រុមហ៊ុន Rolls-Royce Motor Cars Kuala Lumpur ដែលជាក្រុមហ៊ុនចែកចាយរថយន្ត Rolls-Royce នៅប្រទេសម៉ាឡេស៊ី បានធ្វើការបង្ហាញនូវរថយន្តប្រណិតសេរ៊ីទំនើប Ghost ជំនាន់ទី២ ដល់អតិថិជនរបស់ខ្លួន។ បន្ទាប់ពីសិង្ហបុរី, ថៃ និងកម្ពុជា ប្រទេសម៉ាឡេស៊ីគឺជាទីផ្សារបន្ទាប់នៅអាស៊ីអាគ្នេយ៍ដែលមានវត្តមានរថយន្តប្រណិតសេរ៊ីទំនើប Rolls-Royce Ghost នេះ។
សម្រាប់ប្រទេសម៉ាឡេស៊ី រថយន្ត Rolls-Royce Ghost មានជម្រើសទំហំ ២ប្រភេទគឺ Standard Version និងExtended Version។ ដោយ Standard Version មានប្រវែងពីកង់មុខដល់កង់ក្រោយ ៥ ៥៤៥មីលីម៉ែត្រ និង Extended Version មានប្រវែង ៥ ៧១៥មីលីម៉ែត្រ។ ជម្រើសទាំងពីរនេះមានតម្លៃចាប់ពី ៣៥០ ០០០ដុល្លារ ដល់ ៤០០ ០០០ដុល្លរ។
សម្រាប់រថយន្ត Rolls-Royce Ghost បានបំពាក់ជាមួយសម្ភារ:ការពារសម្លេង Soundproof ចំនួន ១០០គីឡូ និងបានអភិវឌ្ឍថ្មីលើ ប្រព័ន្ធរន្ធខ្យល់ថ្មី ដែលជួយឲ្យកាប៊ីនរថយន្តមានភាពស្ងប់ស្ងាត់។
បន្ថែមពីនេះ ផ្នែកខាងក្នុងកាប៊ីនរថយន្តបានរចនាអោយកាន់តែទំនើប និងស្រស់ឆើតឆាត តួរយ៉ាងសម្ភារ:សំខាន់នៅផ្នែកខាងក្នុងនៃរថយន្តនេះភាគច្រើនផលិតឡើងពីដែកមានគុណភាពខ្ពស់ និងឈើប្រណិត។ លើពីនេះវាក៏បានបំពាក់ជាមួយអេក្រង់កម្សាន្ត, អេក្រង់បង្ហាញព័ត៌មាន, ទូទឹកកក និងSpeaker ទំហំ ១ ៣០០វ៉ាត់ ចំនួន ១៨គ្រាប់ សម្រាប់អ្នកដំណើរខាងក្រោយផងដែរ។
រថយន្ត Rolls-Royce Ghost ឆ្នាំ២០២១ បានបំពាក់ជាមួយម៉ាស៊ីនចំណុះ ៦,៧៥លីត្រ Twin-turbochared ទំហំ ១២ស៊ីឡាំង មានកម្លាំង ៥៦៣សេះ កម្លាំងរមួល ៨៥០ញូតុនម៉ែត្រ ដំណើរការដោយប្រអប់លេខ ៨វគ្គអូតូ និងប្រភេទប៉ុងពីរ។ វាអាចស្ទុះពីល្បឿនកុងទ័រ ០-១០០គ.ម/ម៉ ប្រើពេល ៤,៨វិនាទី៕
