កាលពីថ្ងៃអង្គារ ទី២ ខែមីនា ឆ្នាំ២០២១ កន្លងទៅនេះ ទីភ្នាក់ងារព័ត៌មាន Bloomberg បានរាយការណ៍ថា ក្រុមហ៊ុនផលិតរថយន្តវៀតណាម VinFast គ្រោងនឹងបង្កើតរោងចក្រផលិតរថយន្តមួយនៅសហរដ្ឋអាមេរិក ដែលជាផ្នែកមួយនៃយុទ្ធសាស្ត្ររបស់ខ្លួន ដើម្បីចាប់ផ្តើមលក់នៅទីនោះ ក្នុងឆ្នាំ ២០២២។
ទោះជាយ៉ាងណាក៏ដោយ ក្រុមហ៊ុនដែលជាបុត្រសម្ព័ន្ធរបស់ក្រុមហ៊ុន Vingroup នេះ មិនបានផ្តល់ព័ត៌មានលម្អិតអំពីថាតើនឹងត្រូវបង្កើតឡើងនៅពេលណា ឬកន្លែងណានោះទេ។
ទីភ្នាក់ងារព័ត៌មាន Bloomberg បានដកស្រង់សម្តីរបស់លោក Thai Thanh Hai នាយកប្រតិបត្តិ VinFast ថា “ចក្ខុវិស័យរបស់ VinFast គឺដើម្បីក្លាយជាក្រុមហ៊ុនរថយន្តអគ្គិសនីឆ្លាតវៃមួយនៅលើពិភពលោក ហើយសហរដ្ឋអាមេរិកគឺជាទីផ្សារអន្តរជាតិដំបូងគេដែលយើងនឹងផ្តោតលើ។ ដំបូងយើងនឹងផលិតម៉ូដែលប្រភេទ high-end សម្រាប់សហរដ្ឋអាមេរិក”។
គួរឲ្យដឹងដែរថា ក្រុមហ៊ុនវៀតណាមមួយនេះក៏គ្រោងនឹងបើកកន្លែងតាំងបង្ហាញ (Showroom) និងមជ្ឈមណ្ឌលសេវាកម្មចំនួន ៣៥ កន្លែងនៅឆ្នាំនេះ នៅរដ្ឋ California ដែលជាកន្លែង VinFast ទទួលបានអាជ្ញាប័ណ្ណធ្វើតេស្តយានយន្តស្វយ័តនៅតាមដងផ្លូវសាធារណៈរួចជាស្រេច៕
