រថយន្ត Crossover ប្រភេទ HEV របស់ក្រុមហ៊ុនផលិតរថយន្ដរបស់បារាំង Renault មានឈ្មោះថា Filante ត្រូវបានអភិវឌ្ឍរួមគ្នាជាមួយក្រុមហ៊ុនចិន Geely ត្រូវបានដាក់បង្ហាញជាផ្លូវការនៅក្នុងប្រទេសកូរ៉េខាងត្បូង។ រថយន្តនេះបំពាក់នូវប្រព័ន្ធ Hybrid មានកម្លាំងរហូតដល់ ២៤៧ សេះ និងមានតម្លៃប្រហែល ២៩ ៣៩០ ដុល្លារអាមេរិក។ រថយន្ដម៉ូឌែលថ្មីនេះនឹងចាប់ផ្តើមប្រគល់ជូនអតិថិជននៅក្នុងខែមីនាខាងមុខនេះ។
ក្រុមហ៊ុន Geely បានទិញភាគហ៊ុនចំនួន ៣៤,០២% របស់ក្រុមហ៊ុន Renault Korea Motors កាលពីខែឧសភា ឆ្នាំ ២០២២។ នៅក្នុងខែមិថុនា ឆ្នាំ ២០២៤ ក្រុមហ៊ុន Renault និង Geely បានដាក់បង្ហាញរថយន្តដំបូងដែលត្រូវបានអភិវឌ្ឍរួមគ្នា មានឈ្មោះថា Grand Koleos។ រថយន្តនេះត្រូវបានផលិតឡើងដោយផ្អែកលើរថយន្ត Geely Monjaro (Xingyue L) ប្រើប្រាស់គ្រោងឆ្អឹងប្រភេទ CMA Architecture។ រថយន្ត Grand Koleos បានក្លាយជារថយន្តដែលពេញនិយមបំផុតដែលលក់ដោយក្រុមហ៊ុន Renault Korea នៅក្នុងទីផ្សារក្នុងស្រុកយ៉ាងឆាប់រហ័ស។
នៅថ្ងៃទី ១៣ ខែមករា ឆ្នាំ ២០២៦ ក្រុមហ៊ុន Renault Korea បានដាក់បង្ហាញម៉ូឌែលទីពីរ បង្កើតឡើងផ្អែកលើគ្រោងឆ្អឹង CMA modular architecture ។ សម្រាប់រថយន្ដ Renault Filante គឺជាប្រភេទរថយន្ត SUV ខ្នាតធំមានប្រវែងតួខ្លួនសរុប ៤ ៩១៥ មីលីម៉ែត្រ , ទទឹង ១ ៨៩០ មីលីម៉ែត្រ និងកម្ពស់ ១ ៦៣៥ មីលីម៉ែត្រ។ ចំពោះកម្រិតសមត្ថភាពវិញរថយន្តនេះប្រើប្រាស់ប្រព័ន្ធម៉ាស៊ីន Hybrid បែបប្រពៃណី ដំណើរដោយម៉ាស៊ីនចំណុះ ១,៥ លីត្រ រួមបញ្ចូលជាមួយម៉ូទ័រអគ្គិសនីចំនួនពីរ អាចផលិតកម្លាំងសរុបបាន ២៤៧ សេះ។
ជាមួយគ្នានេះរថយន្ដនេះបានបំពាក់នូវអាគុយខ្នាតតូចទំហំ ១,៦៤ kWh តែមិនអាចសាកភ្លើងពីខាងក្រៅបានឡើយ។ ទោះជាយ៉ាងណាក៏ដោយ ក្រុមហ៊ុន Renault បានអះអាងថា អាគុយនេះនឹងអនុញ្ញាតឲ្យ Filante បើកបរក្នុងក្រុងក្នុងរបៀបអគ្គិសនី (electric mode) បានរហូតដល់ ៧៥% នៃពេលវេលាបើកបរ។ សម្រាប់កម្រិតស៊ីប្រេងជាមធ្យមនៃរថយន្ត HEV ខ្នាតធំនេះគឺសុីប្រេងប្រហែល ៦,៦ លីត្រ ក្នុងចម្ងាយផ្លូវ ១០០ គីឡូម៉ែត្រ៕
