[ទីផ្សារបរទេស] រថយន្តអគ្គិសនីបានបន្តកើនឡើងប្រជាប្រិយភាពឥតឈប់ឈរ ដោយកាលពីឆ្នាំ២០២១កន្លងទៅ ចំណែកទីផ្សារនៃរថយន្តនេះបានកើនឡើងដល់ ៦,២% ដែលកើនឡើងពី ៣,១% កាលពីឆ្នាំ២០២០។
ទិន្នន័យដែលបង្ហាញចេញដោយស្ថាប័ន JATO បានបង្ហាញថាមានរថយន្តអគ្គិសនីសុទ្ធ ៤,២លានគ្រឿង បានលក់ចេញលើទីផ្សារសកលលោកកាលពីឆ្នាំ២០២១ ដោយប្រទេសចិនបន្តនាំមុខគេ ដែលមានចំណែកប្រមាណជិតពាក់កណ្ដាលនៃតម្រូវការលើសកលលោក។ ចំណែកទីផ្សារអឺរ៉ុប និងអាមេរិកខាងជើងក៏មានកំណើនតម្រូវការគួរកត់សម្គាល់ផងដែរ។
គួរដឹងផងដែរថា ក្រុមហ៊ុន Tesla នៅតែបន្តនាំមុខគេលើការលក់រថយន្តអគ្គិសនីសុទ្ធ ដោយមានចំណែក ២១% នៃចំនួនលក់សរុបលើសកលលោក។
JATO បាននិយាយថាការរីកចម្រើនរបស់ Tesla បានបើកផ្លូវឲ្យក្រុមហ៊ុនផលិតរថយន្តនៅអឺរ៉ុប និងអាមេរិកខាងជើង បន្តអនុវត្តន៍យុទ្ធសាស្ត្ររថយន្តអគ្គិសនីយ៉ាងពេញទំហឹង។ ចំណែកក្រុមហ៊ុនរថយន្តនៅចិនក៏បានអរគុណដល់ Tesla ដែលបានជួយឲ្យអតិថិជនចាប់អារម្មណ៍រថយន្តអគ្គិសនីកាន់តែខ្លាំង៕
