កម្លាំងម៉ាស៊ីនឡាន Ford F-150 Raptor ស៊េរីថ្មី មានការបញ្ជាក់ហើយថាមិនខ្លាំងលើសមុនឡើយ

នៅពេលដែល Ford បង្ហាញចេញរថយន្ត F-150 Raptor ស៊េរីថ្មីកាលពីដើមឆ្នាំ ក្រុមហ៊ុនបាននិយាយថារថយន្តនេះនឹងមានបំពាក់ដោយម៉ាស៊ីន EcoBoost ៦ស៊ីឡាំង ចំណុះ ៣,៥លីត្រ ដែលមានការអាប់ដេតថ្មី ដោយពេលនោះមិនបានបញ្ជាក់អំពីកម្លាំងរបស់វាឡើយ។

នៅពេលនេះ Ford បានបញ្ជាក់ហើយថាម៉ាស៊ីន EcoBoost ៦ស៊ីឡាំង ចំណុះ ៣,៥លីត្រ នេះគឺមិនមានសមត្ថភាពខ្លាំងលើសមុនឡើយ ពោលគឺតែបន្តផលិតបានកម្លាំង ៤៥០សេះ ដដែល។ កម្លាំងនេះគឺខ្សោយខ្លាំង បើប្រៀបនឹងគូប្រជែង Ram 1500 TRX ដែលផលិតកម្លាំងបាន ៧០២សេះ។

ផ្ទាំងផ្សាយពាណិជ្ជកម្ម

យ៉ាងណាក្ដី Ford ធ្លាប់បានបញ្ជាក់ហើយថានៅឆ្នាំ ២០២២ នឹងមានការបង្ហាញចេញរថយន្ត Raptor R ដែលរំពឹងថានឹងប្រើប្រាស់ម៉ាស៊ីន Supercharged ចំណុះ ៥,២លីត្រ ៨ស៊ីឡាំង ដូចដែលមានប្រើនៅលើរថយន្ត Mustang Shelby GT500។ ម៉ាស៊ីននេះអាចផលិតកម្លាំងបាន ៧៦០សេះ ដែលសក្តិសមជាគូប្រជែងពិតប្រាកដរបស់រថយន្ត Ram 1500 TRX។

ក្រៅពីបានបង្ហាញអំពីសមត្ថភាពនៃម៉ាស៊ីនហើយនោះ គេក៏បានដឹងដែរថារថយន្ត F-150 Raptor ស៊េរីថ្មីបើកទទួលការកុម្ម៉ង់ចាប់ពីថ្ងៃទី១០ ខែមិថុនា ជាមួយតម្លៃដែលចាប់ផ្ដើមពី ៦៥ ៨៤០ដុល្លារ នៅសហរដ្ឋអាមេរិក៕

ផ្ទាំងផ្សាយពាណិជ្ជកម្ម