[ចំណេះដឹង] អ្នកប្រើប្រាស់រថយន្តមួយចំនួនច្រើនបានជឿថា ការបើកបរក្នុងរយៈពេលយូរជាមួយចម្ងាយឆ្ងាយ នៅពេលឈប់មិនគួរពន្លត់ម៉ាស៊ីនភ្លាមៗទេ ព្រោះវាអាចធ្វើឱ្យម៉ាស៊ីនខូច។ ជាក់ស្តែង បើបើកបរផ្លូវឆ្ងាយ ឬប្រើល្បឿនលឿនក្នុងរយៈពេលយូរដែលធ្វើឲ្យម៉ាស៊ីនធ្វើការខ្លាំង ជាពិសេសម៉ាស៊ីនម៉ាស៊ូត turbo ដែលមាននៅក្នុងរថយន្តភីកអាប់ទូទៅ ម៉ាស៊ីនគួរតែទុកចោល ២-៣ នាទីមុនពេលពន្លត់ បើមិនដូច្នេះទេ វាអាចនឹងខូចម៉ាស៊ីន ឬ turbo core។
ដោយសារតែអ្នកប្រើប្រាស់គិតថាធ្វើបែបនេះធ្វើឲ្យមានបញ្ហាដល់ម៉ាស៊ីន ទើបអ្នកប្រើប្រាស់រមួយចំនួនបានបំពាក់បន្ថែម Turbo Timer ដែលជាប្រព័ន្ធជួយពន្យារពេលឲ្យម៉ាស៊ីនដំណើរការបន្តរហូតដល់ពេលកំណត់ បន្ទាប់មកម៉ាស៊ីននឹងបិទដោយស្វ័យប្រវត្តិ បើទោះជាអ្នកបើកបរមិននៅខាងក្នុងរថយន្តក៏ដោយ។
គួរបញ្ជាក់ផងដែរថា នៅពេលបច្ចុប្បន្ននេះមិនមានភស្តុតាងច្បាស់លាស់ដែលថាការពន្លត់ម៉ាស៊ីនភ្លាមៗបន្ទាប់ពីធ្វើដំណើរដ៏យូរនោះវានឹងធ្វើឱ្យម៉ាស៊ីនឬ turbo ខូចដោយសារកំដៅដែលកកកុញក្នុងប្រព័ន្ធនោះទេ ព្រោះបច្ចុប្បន្នវិស្វករបានធ្វើឲ្យប្រសើរឡើងយ៉ាងខ្លាំងនៅប្រព័ន្ធស្អំម៉ាស៊ីន ឬហៅថា cooling system ដែលជួយដល់ម៉ាស៊ីនបានយ៉ាងមានប្រសិទ្ធភាព ។
អ្វីដែលសំខាន់ពិតប្រាកដដែលជួយរក្សាម៉ាស៊ីនឲ្យនៅក្នុងស្ថានភាពល្អគឺការយករថយន្តទៅពិនិត្យជាប្រចាំតាមការបញ្ជាក់ដោយក្រុមហ៊ុនផលិតរថយន្ត នេះនឹងជួយពន្យារអាយុជីវិតរបស់ម៉ាស៊ីន និងរក្សាវាឲ្យស្ថិតក្នុងស្ថានភាពល្អបានយូរផងដែរ ៕
