[ទីផ្សារបរទេស] ក្រុមហ៊ុន Wuling ទទួលបានភាពល្បីល្បាញតាមរយៈការផលិតរថយន្តអគ្គិសនីខ្នាតតូច Mini EV ដែលពេញនិយមខ្លាំងក្នុងប្រទេសចិន ហើយក្រុមហ៊ុននេះទើបបានបង្ហាញរថយន្តអគ្គិសនីខ្នាតតូចថ្មីនៅប្រទេសឥណ្ឌូណេស៊ី។
រថយន្តឈ្មោះថា Wuling EV បានបង្ហាញវត្តមាននៅទីក្រុងចាកាតា ដោយមានរូបរាងតូច ប្រើប្រាស់ថាមពលអគ្គិសនី និងមានរចនាបថបែបអនាគតថែមទៀតផង។
ការបង្ហាញផ្លូវការនូវ Wuling EV នេះ ហាក់មិនបានផ្ដល់ជាព័ត៌មានជុំវិញលក្ខណៈសម្បត្តិនៃរថយន្តនេះឡើយ។ យ៉ាងណាក្ដី កាលពីប៉ុន្មានសប្ដាហ៍មុន រថយន្ត Wuling Air ដែលមានរូបរាងដូចរថយន្តខាងលើបានលេចធ្លាយចេញពីវិបសាយក្រសួងឧស្សាហកម្ម និងព័ត៌មានវិទ្យាចិន និងបានបង្ហាញព័ត៌មានមួយចំនួន។
ក្នុងនោះមានបញ្ជាក់ថារថយន្តនេះមានចំនួនពីរប្រភេទ គឺប្រភេទពីរកៅអីដែលមានប្រវែង ២៥៩៩ម.ម មាន និងប្រភេទបួនកៅអីដែលមានប្រវែង ២៩៧៤ម.ម។ រថយន្តទាំងពីរប្រភេទមានបំពាក់ម៉ូទ័រអគ្គិសនីដែលផលិតកម្លាំងបាន ៤០សេះ ដោយរថយន្តនេះស្ថិតនៅកម្រិតដែលខ្ពស់ជាងរថយន្ត Mini EV និង Nano EV។
រថយន្ត Wuling EV នឹងមានចេញលក់លើទីផ្សារប្រទេសឥណ្ឌូណេស៊ីឆាប់ៗ ហើយវានឹងក្លាយជារថយន្តដែលបម្រើការដឹកជញ្ជូនក្នុងជំនួប G20 នៅកោះបាលី នាខែវិច្ឆិកានេះផងដែរ៕
