ក្រុមហ៊ុន Volkswagen Group ចង់ដណ្តើមយកមកុដរបស់ក្រុមហ៊ុន Tesla ជាក្រុមហ៊ុនផលិតរថយន្តអគ្គិសនីធំបំផុតលើពិភពលោក នៅឆ្នាំ ២០២៥។
ក្រុមហ៊ុនផលិតរថយន្តអាល្លឺម៉ង់ខាងលើ មានបំណងបញ្ចេញរថយន្តអគ្គិសនីឲ្យបានប្រហែល ៧០ ម៉ូដែល នៅទូទាំងពិភពលោក នៅត្រឹមឆ្នាំ ២០៣០។ ក្រុមអ្នកវិភាគនៅ LMC Automotive បាននិយាយថា ក្រុមហ៊ុន Volkswagen Group ពិតជាស្ថិតនៅលើផ្លូវដែលអាចយកឈ្នះលើ Tesla ក្នុងការលក់រថយន្តអគ្គិសនី នៅត្រឹមឆ្នាំ២០២៥។
គួរឲ្យដឹងថា នៅសហរដ្ឋអាមេរិចបច្ចុប្បន្ន ក្រុមហ៊ុន Volkswagen បានលក់រថយន្តអគ្គិសនី ID.4 ហើយនឹងចេញលក់ម៉ូដែល ID.BUZZ និង ID Aero ជាបន្តបន្ទាប់ទៀត។
មិនតែប៉ុណ្ណោះ ក្រុមហ៊ុន Volkswagen Group ក៏មានប្រៀបជាងដែរ ដោយសារតែវាកាន់កាប់ក្រុមហ៊ុនផលិតរថយន្តផ្សេងៗគ្នាជាច្រើនទៀត។ បច្ចុប្បន្ននេះ Tesla មានផលិតលក់ត្រឹមតែរថយន្ត Model 3, Model Y, Model S និង Model X ប៉ុណ្ណោះ ខណៈម៉ូដែលផ្សេងទៀតដូចជា Cybertruck និង Roadster នឹងបង្ហាញខ្លួននាពេលក្រោយ៕
