កាលពីខែឧសភាកន្លងទៅ ក្រុមហ៊ុនរថយន្ត VinFast បានបន្តអនុវត្តិការផ្ដល់តម្លៃពិសេសដើម្បីជួយដល់អតិថិជនដែលទិញរថយន្តក្នុងអំឡុងពេលជួបវិបត្តិកូវីដ១៩។ ការផ្ដល់ជូននេះបានទាក់ទាញចិត្តអតិថិជនជាខ្លាំង ដែលបានជួយឲ្យ VinFast ពង្រឹងលើចំនួនលក់បានកាន់តែល្អក្នុងខែឧសភា។
កាលពីខែកន្លងទៅនេះ VinFast អាចលក់រថយន្ត Fadil បាន ១១៥៦គ្រឿង, រថយន្ត Lux A2.0 បាន ៦៨២គ្រឿង និងរថយន្ត Lux SA2.0 បាន ៣២៣គ្រឿង។ សម្រាប់ខែមិថុនានេះ ការផ្ដល់ជូនតម្លៃពិសេសលែងមានតទៀត ដោយក្រុមហ៊ុននឹងត្រឡប់ប្រើតម្លៃចាស់វិញ ដែលមានការឡើងថ្លៃពី ៤៣០០ ទៅ ៥១០០ ដុល្លារ លើសពីតម្លៃនៅខែឧសភា។
រថយន្ត Lux A2.0 នាពេលបច្ចុប្បន្ននេះមានលក់រាយក្នុងតម្លៃចន្លោះពីប្រមាណ ៤៨ ៧៨៦ដុល្លារ ដល់ ៥៩ ៥៨៩ដុល្លារ ហើយរថយន្ត Lux SA2.0 វិញគឺមានតម្លៃចាប់ពីប្រមាណ ៦៨ ២៧៥ដុល្លារ ដល់ ៨០ ០៩២ដុល្លារ។ សម្រាប់រថយន្ត Fadil វិញនៅតែមានការបញ្ចុះតម្លៃ ១០% ដដែល៕
