ឈ្មួញលក់រថយន្តនៅរដ្ឋ Illinois សហរដ្ឋអាមេរិកបានដាក់ពាក្យបណ្ដឹងប្ដឹងទៅកាន់ក្រុមហ៊ុនរថយន្តអគ្គិសនី Rivian និងក្រុមហ៊ុនរថយន្តអគ្គិសនី Lucid Motors ដែលមិនបានប្រើប្រាស់ឈ្មួញកណ្ដាល ដោយសម្រេចចិត្តលក់រថយន្តទៅកាន់អតិថិជនដោយផ្ទាល់។
ពាក្យបណ្ដឹងត្រូវបានដាក់ដោយសមាគមន៍ឈ្មួញរថយន្តនៅរដ្ឋ Illinois រួមជាមួយដើមបណ្ដឹងដទៃទៀត ក្នុងនោះរួមមានឈ្មួញលក់រថយន្តជាច្រើន ដែលពួកគេបានចោទប្រកាន់ក្រុមហ៊ុនទាំងពីរថាបានល្មើសនឹងច្បាប់របស់រដ្ឋដែលតម្រូវឲ្យរថយន្តថ្មីត្រូវដាក់លក់តាមរយៈឈ្មួញលក់រថយន្តដែលទទួលបានសិទ្ធ។
ទាក់ទងនឹងបញ្ហានេះនៅមិនទាន់មានការឆ្លើយតបពីខាងក្រុមហ៊ុន Rivian ឬក្រុមហ៊ុន Lucid Motors នៅឡើយទេ។
គួរដឹងថាបច្ចុប្បន្ននេះ Rivian កំពុងតែពន្លឿនការផលិតរថយន្តអគ្គិសនីប្រភេទ SUV និងប្រភេទភីកអាប់របស់ខ្លួន ដែលគ្រោងផលិតនៅខែមិថុនាខាងមុខនេះ នៅរោងចក្រដែលស្ថិតនៅរដ្ឋ Illinois ដែលរំពឹងថានឹងមានបុគ្គលិកបម្រើការងារចំនួនជាង ១ពាន់នាក់៕
