ក្រុមហ៊ុន Ineos Automotive របស់ចក្រភពអង់គ្លេស អាចនឹងប្រើប្រាស់គ្រោងឆ្អឹងរថយន្ដចិន Chery iCar V23 ជាមូលដ្ឋានសម្រាប់ការបង្កើតរថយន្តថ្មីរបស់ខ្លួន។
យោងតាមប្រភពផ្ទៃក្នុង បានឲ្យដឹងថា ក្រុមហ៊ុន Ineos Automotive អាចនឹងជ្រើសរើស Chery iCar V23 ជាប្រភេទរថយន្ត SUV ខ្នាតតូចរបស់ប្រទេសចិន ដែលបានដាក់លក់កាលពីឆ្នាំមុន ជាមូលដ្ឋានសម្រាប់ការបង្កើតរថយន្ដម៉ូឌែលទីថ្មីរបស់ខ្លួន។ ក្រុមហ៊ុនមួួយនេះធ្លាប់បានប្រកាសពីមុនមកថា ខ្លួននឹងបោះបង់ចោលផែនការផលិតរថយន្ត SUV តម្លៃសមរម្យ ហើយងាកមករកម៉ូដែលប្រណីតវិញ ប៉ុន្តែឥឡូវនេះបានប្តូរចិត្តម្តងទៀត យោងតាមការចុះផ្សាយរបស់ទស្សនាវដ្តី Autocar បានរាយការណ៍ថា ក្រុមហ៊ុននេះត្រៀមនឹងនាំយករថយន្ដ “Fusilier” ជំនាន់ថ្មីមកវិញកាន់ទីផ្សារ។ ម៉ូឌែលថ្មីនេះនឹងតូចជាងមុនអាចនឹងប្រើប្រាស់គ្រោងឆ្អឹងរបស់រថយន្ដ iCar V23។
រថយន្ត iCar V23 មានការរចនាម៉ូដរាងជ្រុងៗ ស្រដៀងទៅនឹងរថយន្ដរបស់ក្រុមហ៊ុន Ineos ដូច្នេះវាអាចជាជម្រើសដ៏ល្អសម្រាប់ការបង្កើតរថយន្ដថ្មីរបស់ពួកគេ។ ក្រុមហ៊ុន Chery បានដាក់ឲ្យដំណើរការរថយន្ដ iCar របស់ខ្លួននៅក្នុងឆ្នាំ២០២៣ ប៉ុន្តែវាមិនទាន់ត្រូវបានដាក់លក់ជាផ្លូវការនៅប្រទេសរុស្ស៊ី ឬអឺរ៉ុបនៅឡើយទេ។ ទោះជាយ៉ាងណាក៏ដោយ ប្រសិនបើវាចូលមកអឺរ៉ុប វានឹងត្រូវបានគេហៅថា “iCaur” ព្រោះឈ្មោះ “iCar” ត្រូវបានចុះបញ្ជីដោយក្រុមហ៊ុន Apple រួចហើយ។
Ineos Automotive អាចនឹងផលិតរថយន្តនេះនៅរោងចក្រ Mercedes-Benz ចាស់នៅទីក្រុង Hambach ប្រទេសបារាំង ជាមួយនឹងការកែប្រែបន្តិចបន្តួចទៅលើរថយន្ដ iCar V23 វាអាចក្លាយជារថយន្ត SUV កម្រិតថ្មីរបស់ដាក់លក់ក្នុងតម្លៃទាប។ ទិន្នន័យពី JATO Dynamics បង្ហាញថា Ineos បានលក់រថយន្ត Grenadier SUV បានត្រឹមតែ ៣០៧ គ្រឿងប៉ុណ្ណោះនៅក្នុងទ្វីបអឺរ៉ុប ចន្លោះពីខែមករាដល់ខែមេសា ដែលធ្លាក់ចុះ ៣៦% បើធៀបនឹងឆ្នាំមុន ដោយមិនរាប់បញ្ចូលរថយន្តពាណិជ្ជកម្ម ឬរថយន្តភីកអាប់ Quartermaster ។
ក្រុមហ៊ុន Chery ក៏បានចូលខ្លួនមកដល់ទីផ្សារអឺរ៉ុបផងដែរ ដោយបានដាក់ឲ្យដំណើរការម៉ាក Ebro របស់ខ្លួននៅប្រទេសអេស្ប៉ាញ និងកំពុងពិចារណាប្រើប្រាស់រោងចក្រ Volkswagen នៅប្រទេសអាល្លឺម៉ង់ ដើម្បីផលិតម៉ាក Lepas ថ្មីនៅក្នុងប្រទេសចិន។ ក្រុមហ៊ុន Jaguar Land Rover ក៏នឹងប្រើប្រាស់គ្រោងឆ្អឹងរបស់ Chery សម្រាប់ម៉ាក Freelander ថ្មីរបស់ខ្លួនផងដែរ ហើយម៉ាក KGM (អតីត SsangYong) របស់កូរ៉េខាងត្បូងក៏កំពុងត្រៀមប្រើប្រាស់គ្រោងឆ្អឹងរបស់ Chery សម្រាប់ម៉ូដែលថ្មីផងដែរ៕
