ក្រុមហ៊ុនរថយន្តប្រណីតអាឡឺម៉ង់បានប្រកាសថានឹងអនុវត្តគំរូលក់ថ្មីដោយផ្ទាល់ដល់អតិថិជនដោយអ្នកចែកចាយបន្ត ដោយអ្នកចែកចាយបន្តគ្រាន់តែផ្តល់បទពិសោធន៍ប៉ុណ្ណោះ។
នៅក្នុងសេចក្តីប្រកាសដែលបានធ្វើកាលពីថ្ងៃទី ២ ខែមិថុនា ទម្រង់បែបបទអាជីវកម្មថ្មីរបស់ក្រុមហ៊ុន Mercedes នៅក្នុងប្រទេសឥណ្ឌាត្រូវបានគេដាក់ឈ្មោះថា“ Retail of the Future” (ROTF) ។ ដោយម៉ូដែលថ្មីនេះមានគោលបំណងបង្កើនតម្លាភាពរវាងក្រុមហ៊ុនផលិតរថយន្តប្រណីត និងអតិថិជនក៏ដូចជាដៃគូ។
ទម្រង់ថ្មីនេះអនុញ្ញាតឱ្យក្រុមហ៊ុន Mercedes គ្រប់គ្រងទំនិញទាំងអស់ និងលក់ដោយផ្ទាល់ដល់អតិថិជនតាមរយៈប្រព័ន្ធដាក់តាំងបង្ហាញ និងលក់តាមបណ្តាញអ៊ីនធឺណិត។ ROTF គឺខុសគ្នាពីទម្រង់បែបបុរាណនៃការលក់រថយន្តដែលក្រុមហ៊ុនផលិតរថយន្តភាគច្រើនអនុវត្ត នៅពេលដែលឈ្មួញទិញរថយន្តពីក្រុមហ៊ុន Mercedes ហើយបន្ទាប់មកលក់ឱ្យអតិថិជន។ ក្រុមហ៊ុនផលិតរថយន្តប្រណីតរូបនេះក៏បាននិយាយផងដែរថាម៉ូដែលថ្មីនេះនឹងត្រូវបានដាក់លក់នៅទូទាំងប្រទេសឥណ្ឌាចាប់ពីចុងឆ្នាំនេះហើយ។
ការផ្លាស់ប្តូរដ៏ធំបំផុតសម្រាប់អតិថិជន គឺពួកគេនឹងទិញរថយន្តរបស់ពួកគេដោយផ្ទាល់ពីក្រុមហ៊ុន Mercedes ដែលមានន័យថារថយន្តនេះនឹងត្រូវដឹកជញ្ជូនដោយផ្ទាល់ពីក្រុមហ៊ុនផលិតរថយន្តជំនួសឱ្យក្រុមហ៊ុនចែកចាយ។ អតិថិជនឥណ្ឌាក៏ពេញចិត្តនឹងគោលនយោបាយតម្លៃមួយពីក្រុមហ៊ុនដោយមិនចាំបាច់ចរចាជាមួយភ្នាក់ងារដូចសព្វថ្ងៃនេះទេ។ ពួកគេក៏មានឱកាសក្នុងការជ្រើសរើសពីរថយន្តដ៏ច្រើនសន្ធឹកសន្ធាប់ពីក្រុមហ៊ុនមិនមានកំណត់ដូចជាពេលទិញពីអ្នកចែកចាយ ទោះជាយ៉ាងណាក៏ដោយប្រតិបត្តិការ និងការដឹកជញ្ជូនយានយន្តនៅតែត្រូវបានធ្វើឡើងដោយឈ្មួញក្នុងស្រុក ដើម្បីបង្កើនភាពងាយស្រួលសម្រាប់អតិថិជន។
សម្រាប់ក្រុមហ៊ុនចែកចាយអត្ថប្រយោជន៍ធំបំផុត គឺថាពួកគេមិនចាំបាច់ទិញ និងស្តុករថយន្តទេជាពិសេសក្នុងកំឡុងពេលមានជំងឺរាតត្បាត និងការបញ្ជាទិញរាំងស្ទះជាបន្តបន្ទាប់។ ទោះយ៉ាងណាអត្ថប្រយោជន៍ក៏កើតមានផងដែរជាមួយនឹងការផ្លាស់ប្តូរតួនាទីក្រុមហ៊ុនចែកចាយបន្តិច ព្រោះការទទួលខុសត្រូវចម្បងគឺការបង្កើតកន្លែងផ្តល់សេវាថែទាំ និងពង្រឹងទំនាក់ទំនងជាមួយអតិថិជនក៏ដូចជាអនុវត្ត និងសម្រួលដល់ដំណើរការលក់ និងចែកចាយ។ ក្រុមហ៊ុនចែកចាយក៏បន្តរៀបចំការផ្សព្វផ្សាយនិងសកម្មភាពក្នុងស្រុក។
ការលក់រថយន្តដោយផ្ទាល់ដល់អតិថិជន គឺជាទម្រង់មួយដែលត្រូវបានអនុវត្តដោយក្រុមហ៊ុនរថយន្តអគ្គិសនីអាមេរិច Tesla ចាប់តាំងពីដំបូង ហើយក៏ជាអ្នកត្រួសត្រាយនៅក្នុងឧស្សាហកម្មរថយន្តផងដែរ។ Tesla មិនមានក្រុមហ៊ុនចែកចាយទេ ជំនួសមកវិញដោយបន្ទប់តាំងបង្ហាញប៉ុណ្ណោះ៕
