ខេត្ត Guangdong នៃប្រទេសចិន បានចាប់ផ្ដើមការនាំចេញរថយន្តមួយទឹកជាលើកដំបូង ដោយដឹកចេញយកមកលក់នៅប្រទេសកម្ពុជា ដឹកចេញទៅប្រទេសរុស្សី, នីហ្សេរីយ៉ា, ភូមា និងប្រទេសមួយចំនួនទៀត។
ដឹកចេញជំហានដំបូងនេះមានរថយន្តមួយទឹកសរុប ៣០០ គ្រឿង ដែលមានតម្លៃសរុប ២,៥ លានដុល្លារ។ តាមការចុះផ្សាយរបស់ China Daily បានបញ្ជាក់ថារថយន្តដំបូងគេចំនួន ៩ គ្រឿងនឹងធ្វើដំណើរមកកម្ពុជា ក្រោយមានការអនុញ្ញាតពីគយក្នុងស្រុក។ រថយន្ត ៩ គ្រឿងនេះមាន ៣ គ្រឿងជាប្រភេទ SUV និង ៦ គ្រឿងជាប្រភេទ Sedan ដែលមានតម្លៃសរុបប្រមាណ ១៦០ ៥៨៣ ដុល្លារ។
រថយន្តដែលដឹកមកនេះគឺស្ថិតក្រោមកិច្ចព្រមព្រៀងលើការជួញដូរជាមួយប្រទេសនៅតំបន់អាស៊ីអាគ្នេយ៍ ដែលបានចុះហត្ថលេខាកាលពីដើមឆ្នាំនេះ។ រថយន្តទាំង ៩ គ្រឿងនេះដែរគឺបានឆ្លងកាត់ការត្រួតពិនិត្យលើគុណភាព នៅស្ថានីយក្នុងខេត្ត Guangdong កាលពីថ្ងៃទី ១១ ខែកក្កដា៕
