[ទីផ្សារបរទេស] ក្រុមហ៊ុនផលិតរថយន្ត Nissan បានធ្វើការដាក់បង្ហាញចេញនូវតម្លៃជាផ្លូវការរបស់រថយន្តភីកអាប់ Nissan Frontier ស៊េរីឆ្នាំ២០២៥ មុខមាត់ថ្មី សមត្ថភាពខ្លាំងជាងមុន ជាមួយតម្លៃលក់ចាប់ពី ៣៣ ៥៦០ ដុល្លារ ដល់ ៤៦ ៦៦០ ដុល្លារ នៅក្នុុងទីផ្សារសហរដ្ឋអាមេរិក។
Nissan Frontier ស៊េរីឆ្នាំ២០២៥ ថ្មីនេះ ដំណើរការដោយម៉ាស៊ីនចំណុះ ៣,៨ លីត្រ V6 អាចផលិតកម្លាំងបាន ៣១០ សេះ និងកម្លាំងរមួល ៣៨០ ញ៉ូតុនម៉ែត្រ ភ្ជាប់ដោយប្រអប់លេខអូតូ ៩វគ្គ ព្រមទាំងមានសមត្ថិភាពអូសសណ្តោងបានធ្ងន់ជាងមុនគឺដល់ទៅ ៣២៤៣ គីឡូក្រាម ។
សម្រាប់នៅផ្នែកខាងក្រៅរបស់ភីកអាប់នេះ ទទួលបានប៉ាណាមុខថ្មី ក៏ដូចជាថាសកង់ស្ព័រទំហំ ១៧អ៊ីញឌីស្សាញថ្មី ព្រមទាំងចង្កៀងមុខ-ក្រោយ LED ដែលផ្តល់នៅភាពហាប់ណែនជាងមុន។
ចំពោះនៅផ្នែកខាងក្នុងវិញ ទទួលបានការរចនាតាប៊្លូថ្មី ជាមួយអេក្រង់កំសាន្ត Touchscreen ធំជាងមុនទំហំដល់ទៅ ១២,៣ អ៊ីញ អាចប្រើមុខងារ Apple CarPlay និង Android Auto ក៏ដូចជាឧបករណ៍បំពងសំឡេង ១០ចំនុច និងប្រព័ន្ធជំនួយអ្នកបើកបរដែលរួមបញ្ចូលនៅមុខងារដ៏សំបូរបែបផងដែរ៕
