ចំនួនលក់ជាសកលរបស់ក្រុមហ៊ុន Volvo មានការកើនឡើងជាង ២៩% នៅពីរខែដំបូងនៃឆ្នាំ ២០២១ នេះ ដែលកំណើនដ៏ខ្លាំងក្លានេះគឺដោយសារសន្ទុះលក់នៅប្រទេសចិនមានការកើនឡើង។
កាលពីខែកុម្ភៈចំនួនលក់របស់ Volvo មានការកើនឡើងរហូតដល់ ៧៣៧% ធៀបនឹងឆ្នាំ ២០២០ ក៏ដោយសារកាលពីឆ្នាំ ២០២០ ចំនួនលក់របស់ Volvo នៅប្រទេសចិនមានការធ្លាក់ចុះខ្លាំងគួរសម។ ក្នុងរយៈពេល ២ខែដំបូងនៃឆ្នាំ ២០២១ នេះ Volvo អាចលក់រថយន្តបានជិត ៣ម៉ឺនគ្រឿងនៅចិន ដោយនៅលើសកលគឺមានសរុបជាង ១១ម៉ឺនគ្រឿង។
ចំនួនលក់នៅអឺរ៉ុបឯណោះវិញគឺមានការកើនឡើងប្រមាណ ៥% ខណៈដែលនៅសហរដ្ឋអាមេរិកអាចលក់ចេញបាន ១៧ ០០០គ្រឿង ដែលមានការកើនឡើងជិត ២៥% ធៀបនឹងពីរខែដំបូងនៃឆ្នាំ ២០២០។
រថយន្តដែល Volvo អាចលក់ចេញបានច្រើនជាងគេកាលពីខែកុម្ភៈគឺម៉ូដែល XC40 ដែលចំនួនលក់របស់វាមានការកើនឡើងជាង ៥០% ហើយវាមានចំណែកជាង ៣០% នៃចំនួនលក់សរុបរបស់ Volvo។ រថយន្តបន្ទាប់គឺ XC60 ដែលមានចំណែក ២៨% នៃចំនួនលក់សរុប៕
