កាលពីពេលថ្មីៗនេះ ក្រុមហ៊ុន GM និង LG Energy Solution បានធ្វើការប្រកាសជាផ្លូវការថា ពួកនឹងបន្តភាពជាដៃគូរសហការណ៏គ្នាក្នុងការអភិវឌ្ឍន៍ និងផលិតអាគុយសម្រាប់រថយន្តអគ្គិសនី (EV) នៅសហរដ្ឋអាមេរិកជាបន្តទៀត ទោះបីជាមានការបំបែកភាគហ៊ុនក៏ដោយ។
ក្នុងនោះ ក្រុមហ៊ុន GM បានលក់ភាគហ៊ុនចំនួន ១ ពាន់លានដុល្លារ ក្នុងក្រុមហ៊ុនបណ្តាក់ទុនរួមគ្នា Ultium Cells ទៅឲ LG Energy Solution ដើម្បីអនុញ្ញាតឱ្យ LG ផ្ដោតលើការផលិត និងផ្គត់ផ្គង់អាគុយទៅឲក្រុមហ៊ុនផលិតរថយន្តផ្សេងៗ។
ទន្ទឹមនឹងនេះផងដែរ GM នឹងបន្តវិនិយោគសាងសង់ទីតាំងរោងចក្រផលិតថ្ម EV ថ្មីនៅក្នុងតំបន់ Lansing, Michigan ដែលគ្រោងនឹងបើកដំណើរការនៅក្នុងពេលខាងមុខនេះ ដែលនឹងបង្កើតការងារបន្ថែមដល់ ១ ៧០០កន្លែង។
ជាមួយគ្នានេះ ក្រុមហ៊ុនទាំងពីរនឹងបន្តអភិវឌ្ឍន៍បច្ចេកវិទ្យាថ្មថ្មី Prismatic Cells ដែលមានទម្ងន់ស្រាល និងមានតម្លៃលក់ទាប ដើម្បីបង្កើនសង្វាត់ផលិតកម្មថ្មក្នុងការប្រកួតប្រជែងជាមួយនឹងក្រុមហ៊ុនរបស់ប្រទេសចិន៕
