[ទីផ្សារអាស៊ាន] ក្នុងរយៈពេល ២ខែនៃឆ្នាំ ២០២២ ប្រទេសឥណ្ឌូនេស៊ីគឺជាទីផ្សារមួយដែលមានចំនួនលក់រថយន្តខ្ពស់ជាងគេបំផុតនៅក្នុងទីផ្សារអាស៊ាន ដោយយកឈ្មោះប្រទេសថៃ និងម៉ាឡេស៊ី ដែលធ្លាប់ជាទីផ្សាររថយន្តធំផងដែរ។
យោងតាមរបាយការណ៍ចេញពី Southeast Asian Automobile Federation បានបង្ហាញថា រយៈពេលចំនួន ២ខែនៃឆ្នាំ ២០២២នេះ រថយន្តសរុបដែលបានលក់នៅប្រទេសឥណ្ឌូនេស៊ីមានចំនួន ១៦៥ ២៩០គ្រឿង ដោយមានចំនួន ៦៣ ១៧៩គ្រឿងខ្ពស់ជាងឆ្នាំមុន កើនឡើង ៦១,៩ភាគរយ។ ខែមករា ចំនួនលក់បានចំនួន ៨៤ ០៦២គ្រឿង និងខែកុម្ភ បានចំនួន ៨១ ២២៨គ្រឿង។
ចំណែកឯចំណាត់ថ្នាក់ទី ២ បានទៅលើប្រទេសថៃ ដោយលក់រថយន្តបានសរុប ១៤៣ ៩៤៤គ្រឿង កើនឡើង ២៦,១ភាគរយបើប្រៀបធៀបជាមួយឆ្នាំមុន។ ក្នុងនោះខែមករាមានចំនួន ៦៩ ៤៥៥គ្រឿង និងខែកុម្ភៈមានចំនួន ៧៤ ៤៨៩គ្រឿង។
រីឯចំណាត់ថ្នាក់លេខ ៣ បានទៅលើប្រទេសម៉ាសឡេស៊ី ដោយលក់បានសរុប ៨៤ ៣០៣គ្រឿង កើនឡើង ៩,៧គ្រឿង ប្រើប្រៀបធៀបទៅនឹងរយៈពេលដូចគ្នា។ ជាមួយចំនួននេះ ខែមេសារថយន្តលក់បានចំនួន ៤០ ៥៨១គ្រឿង និងខែកុម្ភៈ ៤៣ ៧៧២គ្រឿង។ វៀតណាមស្ថិតនៅចំណាត់ថ្នាក់លេខ ៤ ជាមួយចំនួនលក់សរុបបាន ៥៣ ៥៤៤គ្រឿង កើនឡើង ៣៣,៨ភាគរយ និងចំណាត់ថ្នាក់លេខ ៥ បានទៅលើប្រទេសភីលីពីន ដែលមានចំនួនលក់សរុប ៤៥ ០៦៩គ្រឿង កើនឡើង ៩,២ភាគរយ។ ហើយចំនាត់ថ្នាក់លេខ ៦បានទៅលើប្រទេសសឹង្ហបុរី ដែលមានចំនួនលក់ថយចុះ ដោយបានត្រឹម ៦ ៦៦០គ្រឿងប៉ុណ្ណោះ។
ចំណែកឯទីផ្សារប្រទេសមីយ៉ាន់ម៉ា មានចំនួន ២ ១៣៨គ្រឿង ខណៈចំនួនតួរលេខនៅលើទីផ្សារប្រទេសឡាវ កម្ពុជា និងព្រុយនេ គឺពុំមានការបង្ហាញចេញនូវឡើយនោះទេ។
គួររំលឹកផងដែរថា ចំនួនរថយន្តដែលបានលក់នៅលើទីផ្សារទាំង ៧ គឺមានចំនួនសរុប ៥០០ ៩៤៨គ្រឿង ដោយខែមករាមានចំនួន ២៥០ ៤៧៧គ្រឿង និងខែកុម្ភៈមានចំនួន ២៥០ ៤៧១គ្រឿង កើនឡើង ២៦ភាគរយ ប្រើប្រៀបធៀនទៅនឹងរយៈពេលដូចគ្នាកាលពីឆ្នាំ ២០២១ ដែលមានចំនួន ៣៩៧ ៤៦៣គ្រឿង៕
