ក្រុមហ៊ុន Xiaomi Auto បានឲ្យដឹងថា រថយន្តស៊េរីទំនើប Xiaomi SU7 ត្រូវបានធ្វើបច្ចុប្បន្នភាពបន្ថែម ទទួលបានការបញ្ជាទិញបែប (locked orders) លើសពី ៨០ ០០០ គ្រឿង ក្នុងរយៈពេល ៤៨ ថ្ងៃ គិតចាប់តាំងពីការដាក់បង្ហាញកាលពីថ្ងៃទី ២០ ខែមីនា នេះបើយោងតាមទិន្នន័យរបស់ក្រុមហ៊ុនដែលបានចេញផ្សាយនៅថ្ងៃទី ៦ ខែឧសភា។ តួលេខនេះ សំដៅទៅលើការបញ្ជាទិញដែលត្រូវបានបញ្ជាក់ច្បាស់លាស់ ជាមួយនឹងការបង់ប្រាក់កក់រួចរាល់។
Xiaomi SU7 នេះត្រូវបានដាក់លក់ជា ៣ ជម្រើសផ្សេងគ្នា ដមានតម្លៃចាប់ពី ៣២ ២០០ ដល់ ៤៤ ៥០០ ដុល្លារអាមេរិក។ សម្រាប់ជម្រើសម៉ូឌែល Standard និង Pro ទទួលបានអត្ថប្រយោជន៍ដែលមានតម្លៃស្មើនឹង ៦ ១៥០ ដុល្លារអាមេរិក ខណៈម៉ូឌែល Max រួមបញ្ចូលនូវការលើកទឹកចិត្ត មានតម្លៃរហូតដល់ ៨ ៩៣០ ដុល្លារអាមេរិក។ អត្ថប្រយោជន៍ទាំងនេះរួមមានមុខងារដូចជា កៅអី zero-gravity ជាមួយនឹងប្រព័ន្ធម៉ាស្សា ការកំណត់រចនាសម្ព័ន្ធសម្រាប់កន្លែងផ្ទុកឥវ៉ាន់បន្ថែម និងប្រព័ន្ធជំនួយការបើកបរ HAD របស់ Xiaomi ជាដើម។
បន្ថែមពីនេះផែនការផ្តល់ហិរញ្ញប្បទានមានអត្រាការប្រាក់ទាបក្នុងរយៈពេល ៥ ឆ្នាំ ក៏ត្រូវបានផ្តល់ជូនផងដែរ ដោយមានការបង់ប្រាក់កក់ទាបបំផុតត្រឹមតែ ៧ ៣០០ ដុល្លារនិងការបង់ប្រាក់ប្រចាំខែចាប់ពី ៤៥៦ ដុល្លារឡើងទៅ។ ក្រុមហ៊ុន Xiaomi បានបញ្ជាក់ថាការកែសម្រួលលើការកំណត់រចនាសម្ព័ន្ធជាច្រើនបានចាប់ផ្តើមអនុវត្តចាប់ពីថ្ងៃទី ៦ ខែឧសភានេះតទៅ ដោយផ្ដល់មកជាមួយជម្រើសពណ៌ខាងក្រៅមួយចំនួនរួមមានពណ៌ស្វាយក្រមនិងពណ៌ខ្មៅ។ ចំណែកឯជម្រើសម៉ូឌែល Max ក៏នឹងលែងមានកញ្ចប់តុបតែងរចនាបថពិសេស (special-edition styling package) ធ្លាប់បានផ្តល់ជូនពីមុនមកផងដែរ។
រថយន្ត SU7 នៅតែបន្តបំពាក់នូវម៉ូទ័រ V6S Plus របស់ Xiaomi សម្រាប់គ្រប់ម៉ូឌែលទាំងអស់។ ដោយឡែកសម្រាប់ម៉ូឌែល Standard និង Pro អាចផលិតតកម្លាំងបាន ២៣៥ គីឡូវ៉ាត់ ខណៈម៉ូឌែល Max ប្រើប្រាស់ប្រព័ន្ធម៉ូទ័រភ្លោះ អាចផលិតកម្លាំងបានរហូតដល់ ៥០៨ គីឡូវ៉ាត់។
ទំហំផ្ទុករបស់អាគុយមានភាពខុសគ្នាទៅតាមប្រភេទម៉ូឌែលនីមួយៗដោយក្នុងនោះអាគុយទំហំ ៧៣ គីឡូវ៉ាត់ម៉ោង បំពាក់លើ Standard, អាគុយទំហំ ៩៦.៣ គីឡូវ៉ាត់ម៉ោង បំពាក់លើម៉ូឌែល Pro និងអាគុយទំហំ ១០១.៧ គីឡូវ៉ាត់ម៉ោង បំពាក់លើម៉ូឌែល Max។ រីឯចម្ងាយបើកបរគិតតាមស្ដង់ដារ CLTC មានរយៈចម្ងាយ ៧២០ គីឡូម៉ែត្រ, ៩០២ គីឡូម៉ែត្រ និង ៨៣៥ គីឡូម៉ែត្រ អាស្រ័យទៅតាមទំហំរបស់អាគុយ។
បរិក្ខារផ្នែកខាងក្នុងរបស់ Xiaomi SU7 បំពាក់នូវអេក្រង់កម្សាន្ដទំហំ ១៦.១ អុីញ, កុងទ័រឌីជីថលទំហំ ៧.១ អុីញ និងប្រព័ន្ធបង្ហាញព័ត៌មានលើកញ្ចក់មុខ (head-up display)។ បន្ថែមនេះរថយន្ដនេះក៏បំពាក់ជាមួយបច្ចេកវិទ្យា LiDAR និងប្រព័ន្ធជំនួយការបើកបរ Xiaomi HAD ត្រូវបានបំពាក់មកជាស្តង់ដារសម្រាប់គ្រប់ម៉ូឌែលទាំងអស់នៃរថយន្ត Xiaomi SU7៕
