ក្រុមហ៊ុន Nissan បានដាក់បង្ហាញរថយន្ត Nissan Rogue Plug-in Hybrid 2026 ជាផ្លូវការហើយនឹងត្រៀមដាក់លក់នៅទឹកដីសហរដ្ឋអាមេរិក។ នេះជាជំហានថ្មីមួយទៀតរបស់ក្រុមហ៊ុនជប៉ុនមួយនេះ ហើយក៏ជារថយន្ដប្រភេទ PHEV ដំបូងរបស់ពួកគេដែលត្រូវដាក់លក់ក្នុងទីផ្សារអាមេរិក។
រថយន្ត SUV ថ្មីកៅអី៣ជួរ នេះបានបំពាក់មកជាមួយកញ្ចប់អាគុយទំហំ 20-kWh ដំណើរដោយម៉ាស៊ីនសាំង 2.4 លីត្រ ផ្តល់ជូនរយៈចម្ងាយបើកបរដោយប្រើថាមពលអគ្គិសនីសុទ្ធបានប្រហែល ៦១ គីឡូម៉ែត្រ គិតតាមស្ដង់ដារវាស់ចម្ងាយ EPA ខណៈបើប្រើអគ្គិសនីលាយសាំង អាចបើកបរបានចម្ងាយប្រហែល ៦៧៥ គីឡូម៉ែត្រ។ រថយន្តនេះនឹងបង្ហាញខ្លួនជាលើកដំបូងនៅពិព័រណ៍រថយន្ត Los Angeles Auto Show ចាប់ពីថ្ងៃទី ២១ ដល់ ៣០ ខែវិច្ឆិកា ដោយគ្រោងដាក់លក់នៅដើមឆ្នាំ ២០២៦។
សម្រាប់ Nissan Rogue Plug-in Hybrid 2026 ដំណើរការដោយម៉ូទ័រអគ្គិសនីចំនួន២ អាចផលិតផ្តល់កម្លាំង ២៤៨ សេះ និងកម្លាំងរមួល ៤៥០ញូតុនម៉ែត្រ។ យោងតាមការវាយតម្លៃពីស្ថាប័ន EPA បានបង្ហាញ ការសុីថាមពលគឺប្រហែល 32.72 kWh/100 km ពេលប្រើប្រាស់អគ្គិសនី និងមានកម្រិតស៊ីប្រេងរួមបញ្ចូលគ្នាប្រហែល 9.05 L/100 km ពេលដំណើរការពេលប្រើសាំងរួមបញ្ចូលជាមួយអគ្គិសនី។
រថយន្ដ Nissan Rogue PHEV ក៏ផ្ដល់មកជាមួយជម្រើសនៃការគ្រប់គ្រងថាមពលចំនួនបីរួមមាន៖
- EV Mode មុខងារប្រើប្រាស់អគ្គិសនីសុទ្ធមសម្រាប់ការបើកបរដែលគ្មានការបំភាយឧស្ម័ន។
- Save Mode មុខងារសន្សំរក្សាការថាមពលថ្មសម្រាប់ប្រើប្រាស់នៅពេលក្រោយ។
- Charge Mode មុខងារសាកថ្មដោយប្រើប្រាស់ម៉ាស៊ីនសាំងដើម្បីសាកថាមពលថ្មឡើងវិញ។
បន្ថែមពីនេះរថយន្ដនេះក៏ផ្ដល់ជូននូវរបៀបបើកបរ (drive modes) ចំនួនប្រាំពីររួមមាន Normal (ធម្មតា), Power (កម្លាំង), Eco (សន្សំសំចៃ), Tarmac (ផ្លូវកៅស៊ូ), Gravel (ផ្លូវក្រួស), Snow (ព្រិល) និង Mud (ភក់)។ អ្វីកាន់តែពិសេស Nissan Rogue PHEV ក៏មានបំពាក់មកជាមួយប្រព័ន្ធចាប់ហ្វ្រាំងបង្កើតថាមពលឡើងវិញ (Regenerative braking)។
ចូលមកដល់ផ្នែកខាងក្នុងរថយន្ដនេះបានរចនាមកជាមួយកៅអីបីជួរអាចផ្ទុកអ្នកដំណើរបានប្រាំពីរនា ក់កៅអីជួរទីពីរអាចរុញ, ផ្អៀង និងបត់ទៅមុខ ដើម្បីចូលទៅកាន់ជួរទីបី ខៈទំហំផ្ទុកឥវ៉ាន់មានទំហំ 362.46 លីត្រ នៅពីក្រោយកៅអីជួរទីបី, ពង្រីកដល់ 872.16 លីត្រ នៅពេលបត់កៅអីជួរទីបីចុះ, និងដល់បង្កើនទំហំដល់ 1,832 លីត្រនៅពេលបត់កៅអីជួរទី២និងទី៣ចុះ។
ជាមួយគ្នានេះរថយន្ដត្រូវបានបំពាក់មកជាមួយកញ្ចប់សុវត្ថិភាពស្តង់ដារ រួមមានពោងសុវត្ថិភាព ១១គ្រាន់, ប្រព័ន្ធ ProPILOT Assist ជួយរក្សាគម្លាតដែលបានកំណត់ទុកជាមុនរវាងអ្នក និងរថយន្តនៅខាងមុខ, ជួយឲ្យរថយន្ដស្ថិតនៅគន្លងផ្លូវត្រឹមត្រូវ, មុខងារជំនួយពេលស្ទះចរចារណ៍ (stop-and-go traffic), ប្រព័ន្ធកាមេរ៉ា ៣៦០ដឺក្រេ និងបច្ចេកវិទ្យា Nissan Safety Shield 360។ នៅផ្នែកខាងមុខរថយន្ដនេះបានបំពាក់មកជាមួយអេក្រង់កុងទ័រទំហំ ១២.៣ អុីញ អេក្រង់កម្សាន្ដទំហំ ៩ អុីញ មានមុខងារ Head-Up Display ដំបូលកញ្ចក់បែប panoramic (panoramic moonroof), និងកញ្ចក់ការពារសំឡេងរំខាន (acoustic glass) កៅអីខាងមុខមានកម្តៅ និងមានរន្ធ USB ចំនួន ៤ ខាងមុខពីរនិងខាងក្រោយពីរ៕
