[បរទេស] កាលពីពេលថ្មីៗនេះ លោក Elon Musk បានធ្វើដំណើរទស្សនកិច្ចដោយមិនប្រកាសមួយ បានជួបនាយករដ្ឋមន្ត្រី Li Qiang នៅទីក្រុងប៉េកាំងជាកន្លែងដែលគាត់ត្រូវបានគេរំពឹងថានឹងពិភាក្សាអំពីការដំណើរការកម្មវិធី Full Self-Driving (FSD) និងការអនុញ្ញាតឲ្យផ្ទេរទិន្នន័យទៅក្រៅប្រទេស ។
ក្នុងនោះ យោងតាមរបាយការណ៍មួយបានអះអាងថា ក្រុមហ៊ុនផលិតរថយន្តអគ្គិសនី Tesla ក៏បានចុះកិច្ចព្រមព្រៀងជាមួយក្រុមហ៊ុនអ៊ីនធឺណិតធំបំផុតរបស់ប្រទេសចិន Baidu អនុញ្ញាតឲ្យ Tesla អាចចូលប្រើប្រាស់ទិន្នន័យផែនទីដែលចាំបាច់ដើម្បីដាក់ចូលនៅប្រព័ន្ធ Full Self-Driving system នៅក្នុងប្រទេសចិន ។
ទោបីជាភាពជាដៃគូរវាងក្រុមហ៊ុន Tesla និងក្រុមហ៊ុន Baidu ចាប់ផ្តើមតាំងពីឆ្នាំ ២០២០ មកក៏ដោយ ក៏កិច្ចព្រមព្រៀងនេះ មិនមែនផ្តាច់មុខលើទិន្នន័យផែនទីរបស់ Baidu ទេ ដោយក្រុមហ៊ុនបានបញ្ជាក់ថា ខ្លួនកំពុងធ្វើការជាមួយក្រុមហ៊ុនជាច្រើនផ្សេងទៀតទៅលើប្រព័ន្ធនេះផងដែរ ។
គួរបញ្ជាក់ផងដែរថា ចំពោះក្រុមហ៊ុនផលិតរថយន្តបរទេសដែលចង់បើកដំណើរការប្រព័ន្ធបើកបរខ្លួនឯង FSD ត្រូវតែសហការជាមួយក្រុមហ៊ុនចិនដើម្បីទទួលបានអាជ្ញាប័ណ្ណ ដោយក្នុងនោះ ក្រុមហ៊ុន Baidu ដែលជាក្រុមហ៊ុនមួយក្នុងចំណោមក្រុមហ៊ុន ១២ បច្ចុប្បន្នដែលអាចមានសិទ្ធផ្តល់នៅអាជ្ញាប័ណ្ឌនេះ ។
គួរឲ្យដឹងថា ប្រព័ន្ធបើកបរដោយខ្លួនពេញលេញ FSD មិនត្រូវបានផ្តល់ជូននៅក្នុងទ្វីបអឺរ៉ុបទេ ប៉ុន្តែមាននៅក្នុងសហរដ្ឋអាមេរិក ដែលប្រព័ន្ធស្វយ័តរបស់ Tesla ត្រូវបានកំពុងបើកការស៊ើបអង្កេតពីអង្គភាព NHTSA ទៀតផង ៕
