រថយន្ត Lamborghini Aventador បានបិទលែងទទួលការកុម្ម៉ង់ជាផ្លូវការ ដោយមានរថយន្តម៉ូដែល Aventador Ultimae ជាម៉ូដែលបិទបញ្ចប់នៃត្រកូលរថយន្ត Aventador មួយនេះ។ ប៉ុន្តែ Lamborghini បានសន្យាថាម៉ាស៊ីន V12 របស់ខ្លួន នឹងនៅបន្តមានជីវិត ហើយមានជីវិតដោយមានការផ្សែផ្សាំជាមួយថាមពល Hybrid។
រថយន្ត Aventador បានបង្ហាញវត្តមានជាលើកដំបូងនៅក្នុងកម្មវិធី Geneva Motor Show ឆ្នាំ២០១១ ដែលពេលនោះវាចូលមកជំនួសរថយន្ត Murcielago។ ក្រោយចូលរោងចក្រផលិតអស់រយៈពេល១០ឆ្នាំ រថយន្តនេះត្រូវបានកំណត់ឲ្យម៉ូដែលថ្មីចូលមកជំនួសតំណែងជាបន្ត នៅត្រឹមដំណាច់ឆ្នាំ២០២២ ឬនៅដើមឆ្នាំ២០២២។
Lamborghini បាននិយាយថាការដឹកជញ្ជូនរថយន្ត Lamborghini Aventador Ultimate នឹងបន្តរហូតដល់ចុងឆ្នាំ២០២២ ប៉ុន្តែការកុម្ម៉ង់ទិញសម្រាប់រថយន្តនេះត្រូវបានបិទបញ្ចប់ជាផ្លូវការចាប់ពីពេលនេះតទៅហើយ។
គួរដឹងថា Aventador ធ្លាប់ជារថយន្តដែលជោគជ័យមួយសម្រាប់ Lamborghini ដោយរយៈពេល៥ឆ្នាំប៉ុណ្ណោះ ក្រុមហ៊ុនអាចលក់រថយន្តនេះបានដល់ខ្ទង់ ៥ពាន់គ្រឿង៕
