ភីកអាប់ដើរដោយថាមពលអ៊ីដ្រូហ្សែនរបស់អូស្ត្រាលី ចេញតម្លៃលក់ខ្ទង់ ១៤ម៉ឺនដុល្លារ

នៅចុងខែកក្កដាកន្លងទៅ ក្រុមហ៊ុនអូស្រ្តាលី H2X Global បានប្រកាសពីការវិលត្រឡប់របស់ខ្លួនជាមួយនឹងរថយន្តភីកអាប់ដើរដោយថាមពលអ៊ីដ្រូហ្សែនដែលប្រើប្រាស់តួរខ្លួនរបស់ Ford Ranger ឈ្មោះថា H2X Warrego។

មកដល់ពេលនេះក្រុមហ៊ុនក៏បានបញ្ចេញតម្លៃផងដែរ យោងតាមការរាយការណ៍ពី CarSale បាននិយាយថា​រថយន្ត H2X Warrego នឹងមានតម្លៃចាប់ពី ១៣៩ ០០០ដុល្លារ សម្រាប់ម៉ូឌែល Warrego 66 និង ១៧២ ០០០ដុល្លារសម្រាប់ Warrego 90 ខណៈពេលប្រភេទកប់បំផុត Warrego 90 XR មានតម្លៃចាប់ពី ១៨៣ ០០០ដុល្លារ។ បន្ថែមពីនេះមកដល់ពេលនេះរថយន្ត H2X ទទួលបានការកក់សរុប ២៥០គ្រឿងហើយ។

គួរបញ្ជាក់ផងដែរថាសម្រាប់ប្រភេទកប់បំផុតមានកម្លាំងសរុប ៤១៦សេះ(ថាមពលអ៊ីដ្រូហ្សែន ១២១សេះ និងថាមពលម៉ូទ័រ ២៩៥សេះ) និងកម្លាំងបង្វិល ៣៥០ញ៉ូតុនម៉ែត្រ ព្រមទាំងមានសម្ថភាពអូសសណ្តោងបាន ២ ៥០០គីឡូក្រាមផងដែរ៕