រដ្ឋមន្រ្តីក្រសួងមហាផ្ទៃ បានណែនាំឲ្យនគរបាលចរាចរណ៍ ចាប់ផ្តើមរឹតបន្តឹងច្បាប់ឡើងវិញ។ ក្នុងនោះ ការចាប់ល្បឿនដែលបើកបរលើសកំណត់ពីច្បាប់ គឺជាចំណុចដែលអ្នកបើកបរទាំងឡាយ ត្រូវចាប់អារម្មណ៍បំផុត និងត្រូវគោរពយ៉ាងខ្ជាប់ខ្ជួន បើទោះបីជាពេលនេះ នៅត្រឹមការអប់រំ មិនទាន់មានការផាកពិន័យក៏ដោយ។
យោងតាមអនុក្រឹត្យស្តីពី «ការកំណត់ល្បឿនសម្រាប់យានជំនិះ» ចុះកាលពីថ្ងៃទី៨ ខែកក្កដា ឆ្នាំ២០១៥ បានចែងពីលក្ខខណ្ឌសម្រាប់់បើកបររថយន្តនៅតាមផ្លូវថ្នល់ ដូចខាងក្រោម៖
១. អ្នកបើកបរត្រូវប្រើប្រាស់ល្បឿនស្របតាមផ្លាកសញ្ញាកំណត់ល្បឿនអតិបរមានៅតាមដងផ្លូវ។
២. នៅកន្លែងដែលពុំមានផ្លាកសញ្ញាកំណត់ល្បឿន អ្នកបើកបរត្រូវប្រើប្រាស់ល្បឿនអតិបរមា ដូចខាងក្រោម៖
ក. នៅក្នុងទីប្រជុំជនល្បឿនអតិបរមា ត្រូវកំណត់ត្រឹម ៤០គីឡូម៉ែត្រ/ម៉ោង សម្រាប់រថយន្តគ្រប់ប្រភេទ។
ខ. នៅក្រៅទីប្រជុំជន ល្បឿនអតិបរមា ត្រូវកំណត់ត្រឹម ៨០គីឡូម៉ែត្រ/ម៉ោង សម្រាប់រថយន្តធុនស្រាល និងរថយន្តដឹកអ្នកដំណើរ និងអាចបើកបរដល់ល្បឿន ៩០គីឡូម៉ែត្រ/ម៉ោង នៅលើផ្លូវដែលមានខឿនបែងចែកទិសចរាចរណ៍ជាពីរ ហើយមានគន្លងផ្លូវចាប់ពី៤ឡើងទៅ។
គួរយល់ដឹងបន្ថែមដែរថា អ្នកបើកបរត្រូវគ្រប់គ្រងលើល្បឿនបើកបររបស់ខ្លួនជានិច្ច ហើយត្រូវបើកបរក្នុងល្បឿនសមស្របទៅតាមស្ថានភាពជាក់ស្តែង ដើម្បីអាចបញ្ឈប់យានជំនិះបានទាន់ពេលវេលា និងដោយគ្មានគ្រោះថ្នាក់៕
