រថយន្ត Genesis GV80 ឆ្នាំ ២០២១ បានបង្ហាញខ្លួននៅសហរដ្ឋអាមេរិកកាលពីខែមករាកន្លងទៅ ហើយវាចាប់ផ្ដើមឲ្យជាសញ្ញាជោគជ័យមុនការចេញលក់ជាផ្លូវការនៅអំឡុងចុងឆ្នាំ ២០២០ នេះ។
លោក Mark Del Rosso នាយកប្រតិបត្តិ Genesis បានបញ្ជាក់ថាក្រុមហ៊ុនរបស់ខ្លួនបានទទួលការកក់ទុកនូវរថយន្ត GV80 បានជិត ១ម៉ឺនគ្រឿងមកហើយ ជាចំនួនលក់ដ៏ច្រើនមួយសម្រាប់ម៉ាករថយន្តប្រណីតរបស់កូរ៉េខាងត្បូងនេះ។ លោកបានបញ្ជាក់យ៉ាងច្បាស់ដែរថា ការចេញលក់រថយន្តនេះនឹងមិនរងផលប៉ះពាល់ពីវិបត្តិកូវីដ១៩នោះឡើយ គឺនឹងចេញលក់តាមពេលកំណត់ រួមជាមួយម៉ូដែល Genesis G80 ឆ្នាំ ២០២១ ផងដែរ។
សម្រាប់ម៉ូដែល Genesis G80 វិញ លោក Mark បានឲ្យដឹងថាវាអាចទទួលបានការកក់ប្រហែល ១៥០០ គ្រឿង ក្រោយពីបានបង្ហាញមុខកាលពីចុងខែមីនារួចមក។
និយាយអំពីរថយន្ត SUV GV80 វិញ វាមិនត្រឹមតែមានរូបរាងលេចធ្លោ ស្អាតទាំងក្នុងទាំងក្រៅនោះទេ ប៉ុន្តែតម្លៃក៏ធូរជាងគូប្រជែងខ្លាំងដែរ មានដូចជា BMW X5, Cadillac XT6 និង Lincoln Aviator ដែលបីម៉ូដែលនេះមានតម្លៃចាប់ពី ៥ម៉ឺនដុល្លារឡើង ខណៈដែល GV80 មានតម្លៃចាប់ពី ៤៨ ៩០០ដុល្លារ៕
