ក្រុមហ៊ុនផលិតរថយន្តអគ្គិសនីដែលទើបដំណើរការថ្មីថ្មោងឈ្មោះ Lordstown Motors ដែលបានទិញរោងចក្រផលិតរថយន្តនៅ Ohio ពី Ford នោះ រំពឹងថាបង្ហាញរថយន្តភីកអាប់អគ្គិសនីរបស់ខ្លួននាចុងខែមិថុនា។
ផែនការពីដំបូងគឺក្រុមហ៊ុនចង់បង្ហាញរថយន្តម៉ូដែល Endurance របស់ខ្លួនក្នុងកម្មវិធីតាំងបង្ហាញរថយន្ត Detroit Auto Show នាខែក្រោយ ប៉ុន្តែដោយសារកម្មវិធីត្រូវរំសាយ ទើបមានការផ្លាស់ប្ដូរផែនការ ត្រូវបង្ហាញរថយន្តតាមកម្មវិធីអនឡាញនាចុងខែមិថុនានេះវិញ។
ដើម្បីឲ្យការរង់ចាំការបង្ហាញកាន់តែរំជើបរំជួលនោះ Lordstown Motors បានបង្ហោះរូបភាពពិតៗបង្ហាញពីរូបរាងរថយន្តនៅលើវិបសាយរបស់ខ្លួនជាមុន។ ចំពោះលក្ខណៈសម្បត្តិរបស់ភីកអាប់អគ្គិសនីនេះ គេដឹងថាវានឹងមានបំពាក់ម៉ូទ័រអគ្គិសនីចំនួនបួនសម្រាប់ផ្ដល់កម្លាំងដល់កង់ទាំងអស់ ដែលមានកម្លាំងសរុប ៦០០សេះ អាចឲ្យវាស្ទុះពី ០-៩៦ គ.ម/ម៉ ក្នុងពេល ៥,៥វិនាទី ហើយវាមានល្បឿនអតិបរមាដែលកំណត់ត្រឹម ១២៨ គ.ម/ម៉។
ក្រុមហ៊ុនបានអះអាងថារថយន្ត Endurance នេះអាចបើកបរបានចម្ងាយ ៤០២ គីឡូម៉ែត្រ ពេលសាកភ្លើងពេញម្ដង។ អាគុយរបស់រថយន្តអាចសាកពី ០ ដល់ ៩៥% ក្នុងពេល ១០ម៉ោង ដោយប្រើប្រាស់ឆ្នាំងសាក Level 2 7kw ឬចំណាយពេល ៣០នាទី ទៅ ១,៥ម៉ោង ដោយប្រើឆ្នាំងសាក Level 3 DC។
គួរដឹងថារថយន្ត Endurance នេះនឹងមានដាក់លក់ក្នុងតម្លៃ ៥២ ៥០០ដុល្លារ៕
