[បរទេស] ជាច្រើនឆ្នាំមកនេះ លោក Akio Toyoda ប្រធានក្រុមហ៊ុនផលិតរថយន្ត Toyota នៅតែប្រកាន់ខ្ជាប់នៅទស្សនៈរបស់គាត់ដែលថា ការប្តូរទៅប្រើប្រាស់រថយន្តអគ្គិសនីសុទ្ធទាំងស្រុងមិនមែនជាយុទ្ធសាស្ត្រត្រឹមត្រូវនោះទេ ហើយការផ្លាស់ប្តូរទៅប្រើប្រាស់រថយន្តអគ្គិសនីសុទ្ធ BEV នឹងមានផលវិបាកយ៉ាងធំធេងនៅទូទាំងឧស្សាហកម្មរថយន្តទាំងមូល។
ក្នុងនោះ ចៅប្រុសរបស់ស្ថានិកក្រុមហ៊ុន Toyota រូបនេះ នៅតែជឿជាក់ថា ការងាររាប់លាននៅក្នុងខ្សែច្រវាក់ផលិតកម្មអាចមានហានិភ័យប្រសិនបើរថយន្តប្រើម៉ាស៊ីនចំហេះខាងក្នុង (ICE) ត្រូវបានបញ្ឈប់លឿនពេក ហើយទាក់ទងនឹងបរិស្ថានវិញ គាត់ទទូចថា រថយន្តប្រភេទកូនកាត់ Hybrid នៅតែល្អជាងរថយន្តអគ្គិសនីអគ្គីសនីសុទ្ធ (BEVs)។
លោកបានអះអាងថា ក្រុមហ៊ុនផលិតរថយន្ត Toyota បានលក់រថយន្តប្រភេទកូនកាត់ Hybrid បានប្រហែលចំនួន ២៧លានគ្រឿង គិតចាប់តាំងពីម៉ូដែល Prius ជំនាន់ទី ១ ដែលបានដាក់លក់ក្នុងឆ្នាំ ១៩៩៧ ហើយរថយន្តកូនកាត់ទាំងនេះមានការបញ្ចេញកាបូនឌីអុកស៊ីត ដែលជាឧស្ម័នពុល ស្មើនឹងរថយន្តអគ្គីសនីសុទ្ធ (BEVs) ចំនួនតែជាង ៩លានគ្រឿងប៉ុណ្ណោះ ប្រសិនបើអ្នកពិចារណាការផលិតរថយន្ត និងអាគុយ។ មិនត្រឹមតែប៉ុណ្ណោះ លោក Akio Toyoda បន្ថែមថា រថយន្តអគ្គិសនីសុទ្ធតែ ១គ្រឿងមានការបំភាយឧស្ម័នស្មើរថយន្តប្រភេទ Hybrid ចំនួន ៣គ្រឿង។
បន្ថែមពីលើនេះ លោក Akio Toyoda បានពន្យល់ថា “ប្រសិនបើយើងផលិតរថយន្តអគ្គីសនីសុទ្ធ BEVs ចំនួន ៩លានគ្រឿង នៅក្នុងប្រទេសជប៉ុន ការបំភាយកាបូនពិតជានឹងកើនឡើង មិនមែនថយចុះទេ។ មូលហេតុគឺបណ្តាញអគ្គិសនីរបស់ប្រទេសជប៉ុនពឹងផ្អែកលើរោងចក្រថាមពលកំដៅ” ៕
