[ទីផ្សារបរទេស] ក្រុមហ៊ុន Horwin បានធ្វើការដាក់បង្ហាញនូវម៉ូតូអគ្គិសនី SK3 ស៊េរីឆ្នាំ ២០២២ ប្រភេទ Maxi Scooter ជាមួយការសាកភ្លើងពេញម្តងអាចជិះបានចម្ងាយ ១៦០ គ.ម សម្រាប់ទៅផ្សារនៅក្នុងប្រទេសអូទ្រីស។
រូបរាងម៉ូតូអគ្គិសនី Horwin SK3 រចនាទ្បើងស្រដៀងគ្នាទៅនឹង Yamaha E05 ដោយបំពាក់នូវចង្កៀងមុខ-ក្រោយប្រភេទ LED, កុងទ័រឌីជីថល TFT ភ្ជាប់ជាមួយស្មាតហ្វូន សោរឆ្លាតវៃ រន្ធសាក USB ប្រភេទ A ចំនួន ២ តំបន់ និងកន្លែងផ្ទុកក្រោមកៅអីអាចដាក់បានរបរជាច្រើនទៀត។
ហើយអ្វីដែលពិសេសនោះម៉ូតូអគ្គិសនី Horwin SK3 ក៏បានបំពាក់នូវប្រព័ន្ធហ្វ្រាំងគឺជាឌីសមុខ-ក្រោយ ជាមួយនឹងប្រព័ន្ធហ្វ្រាំង ABS កម្រិតខ្ពស់របស់ក្រុមហ៊ុនអូទ្រីសដែរ។
សម្រាប់ម៉ូតូអគ្គិសនី Horwin SK3 បានបំពាក់ម៉ូទ័រអគ្គិសនី ៣៦ AH រួមជាមួយនឹងថ្មលីចូមអ៊ីយ៉ុង ២៧២ V ដែលអាចបើកបរបានចម្ងាយ ១៦០ គីឡូម៉ែត្រ ក្នុងកម្រិតសាកភ្លើងពេញម្តង និងការសាកភ្លើងល្បឿនលឿន DC ត្រូវចំណាយពេល ៤,៥ ម៉ោងប៉ុណ្ណោះ។ បន្ថែមពីនេះម៉ូតូអគ្គិសនី Horwin SK3 មានមុខងារជំនួសថ្មធ្វើឱ្យម៉ូតូអគ្គិសនីនេះអាចរត់បានជាង ៣០០ គីឡូម៉ែត្រផងដែរ។
សូមបញ្ជាក់ថាម៉ូតូអគ្គិសនី Horwin SK3 ស៊េរីឆ្នាំ ២០២២ មានជម្រើស ៣ ពណ៌ និងមានតម្លៃចាប់ពី ៤ ៧៩០ ដុល្លារសហរដ្ឋអាមេរិក ដែលរួមបញ្ចូលម៉ូតូនិងអាគុយ ១ និងអាគុយ ២ តម្លៃ ៥ ៩៦១ សម្រាប់ទីផ្សារនៅតំបន់អឺរ៉ុប៕
