ក្រុមហ៊ុនចាប់ផ្តើមអាជីវកម្មថ្មីមួយឈ្មោះ Dacora Motors បានដាក់បង្ហាញគម្រូរថយន្តប្រណីតទំនើប ដែលផលិតនៅសហររដ្ឋអាមេរិក រចនាតាមលំនាំបែបបុរាណ។ រថយន្ដនេះរចនាឡើងដោយសហការជាមួយក្រុមហ៊ុន Pininfarina Group ដ៏ល្បីល្បាញ ត្រូវបានគេស្គាល់ថាបទពិសោធរចនាយានយន្តល្បីៗ ដូចជារថយន្ដ Ferrari និងម៉ាកយីហោប្រណីតផ្សេងទៀត។
ផ្នែកខាងក្នុងរបស់រថយន្ដបានបំពាក់មកជាមួយឈើ ហើយក្រណាត់ត្បាញពីរោមចៀមនិងស្បែកសរីរាង្គដែលគ្មានជាតិពុល។ ចំពោះអេក្រង់ឌីជីថលត្រូវបានបញ្ចាំងជា Slide ទៅលើបន្ទះឈើ ដោយឧបករណ៍រាងមូលនៅចំកណ្ដាល។
ក្រុមហ៊ុនក៏មិនទាន់បញ្ជាក់ច្បាស់លាស់លើព័ត៌មានលម្អិតសំខាន់ៗ ពួកគេបានបន្ថែមថា ផ្នែកខាងក្នុងនឹងអាចផ្លាស់ប្ដូរទាំងស្រុង (fully modular) និងអាចធ្វើកាន់តែប្រណីត។ រថយន្ដនេះអាចនឹងចេញលក់ពីរដងក្នុងមួយឆ្នាំ ហើយអនុញ្ញាតឲ្យម្ចាស់រថយន្ត ផ្លាស់ប្ដូរបរិក្ខានៅផ្នែកខាងក្នុងបាន ។
ផ្នែកខាងក្រោយរថយន្ដផ្ដោតសំខាន់លើឯកជនភាពរ ផ្ដល់ជាកន្លែងសម្រាប់ធ្វើការរផ្ទាល់ខ្លួននិងប្រើជាបន្ទប់ទទួលភ្ញៀវនិងពិភាក្សាការងារ ដោយបំពាក់មកជាមួយកៅអីបែប captain’s chairs។
កាន់តែពិសេសនៅផ្នែកខាងក្រោយក៏មានទូរសម្រាប់ដាក់បារី, មានម៉ាស៊ីនឆុងកាហ្វេ ពួកគេក៏មានគម្រោងបន្ថែមទូរសុវត្ថិភាព និង ទូរទឹកកកផងដែរ។
ក្រុមហ៊ុន Dacora បានអះអាងថារថយន្តនេះមានកម្លាំងជាង ៨០០សេះ និងអាចបើកបរបានចម្ងាយប្រហែល ៦៤៤គីឡូម៉ែត្រមានទម្ងន់ ២ ៩៤៨គីឡូក្រាម អាចជាន់ស្ទុះពីកុងទ័រ ០-៩៦គីឡូម៉ែត្រក្នុងមួយម៉ោង ប្រើពេលតិចជាង ៤វិនាទី។ ប្រសិនបើអតិថិជនមិនចូលចិត្តការប្រើប្រាស់ថាមពលអគ្គិសនីសុទ្ធ ពួកគេបានសន្យាថានឹងផ្តល់ជូននូវ ម៉ាស៊ីន Hybrid ដើម្បីផ្ដល់ភាពងាយស្រួលដល់អ្នកប្រើប្រាស់។ តាមរំពឹងទុករថយន្ដនេះអាចដាក់លក់ក្នុងតម្លៃចាប់ផ្តើមពី ៥០០ ០០០ដុល្លារ ការកក់ឥឡូវនេះកំពុងបើកទទួលជាមួយការកក់មុនក្នុងទឹកប្រាក់ចំនួន ៥០ ០០០ដុល្លារ ហើយជាជម្រើសអាចដកលុយវិញបាន៕
