[បរទេស] តាមប្រភពព័ត៌មាន 7NEWS បានឲ្យដឹងថា កាលពីថ្ងៃទី២៣ ខែមករាកន្លងទៅ នៅក្នុងព្រឹត្តិការណ៍មួយនៅឯទីលានប្រណាំង Great Western Racecourse រដ្ឋ Victoria ក្នុងប្រទេសអូស្រ្តាលី ស្រាប់តែក្លាយជាគ្រោះមហន្តរាយ ហើយត្រូវបានគេប្រដូចទៅនឹងព្យុះភ្លើង និងបានឆេះរថយន្តរបស់អ្នកដែលបានចូលរួមព្រឹត្តិការណ៍ប្រចាំឆ្នាំនេះប្រហែល ២០គ្រឿង។
តាមវីដេអូដែលថតបាននៅនឹងកន្លែងឆេះបានបង្ហាញពីភ្លើងឆេះយ៉ាងសន្ធោសន្ធៅដោយមានផ្សែងខ្មៅហុយឡើងអមដោយការផ្ទុះយ៉ាងខ្លាំង។ មនុស្សម្នាក់បាននិយាយនៅកន្លែងកើតហេតុថាជា “ព្យុះភ្លើង” ។ ក្នុងហេតុការណ៍នេះ ក៏បុរសម្នាក់បានលោតចូលរថយន្តបានបើកគេចខ្លួនយ៉ាងលឿន ខណៈដែលភ្លើងកំពុងឆេះយ៉ាងសន្ធោសន្ធៅ។
មិនមានរបាយការណ៍អំពីអ្នកស្លាប់ និងរបួសក្នុងចំណោមមនុស្សរាប់ពាន់នាក់ដែលមានវត្តមាននៅឯទីលានប្រណាំងនោះទេ។ ក្រុមអ្នកពន្លត់អគ្គីភ័យបានចំណាយពេលជាច្រើនម៉ោងដើម្បីពន្លត់ភ្លើងនៅលើស្មៅប្រហែល ៥ ០០០ ម៉ែត្រការ៉េ ហើយមូលហេតុនៃការឆាបឆេះនេះនៅមិនទាន់ដឹងនៅឡើយទេ៕
