រោងចក្រផលិត និងដំឡើងរថយន្តនៅក្នុងប្រទេសកម្ពុជា

ដែលគិតមកដល់សព្វថ្ងែនេះនៅក្នុងប្រទេសកម្ពុជារបស់យើងគឺមានរោងចក្រផលិតនិងដំឡើងយានយន្តជាច្រើនកន្លែង ដែលទីតាំងមួយចំនួនគឺបានដាក់អោយដំណើរការហើយ និងទីតាំងខ្លះទៀតគឺកំពុងតែស្ថិតនៅក្រោមការសាងសង់និងគ្រោងដាក់អោយដំណើរការក្នុងពេលឆាប់ៗ ។ តើរោងចក្រផលិតឬដំឡើងផ្នែកយានយន្តនៅកម្ពុជាទាំងអស់នេះបានបោះទុន វិនិយោគជាទឹកប្រាក់ចំនួនប៉ុន្មានលានដុល្លារ និងបានផ្តល់ឱកាសការងារដល់កម្ពុជាប៉ុន្មានកន្លែង? ក្នុងអត្ថបទនេះយើងនិងមកដឹងនិងស្គាល់អំពីររោងចក្រនីមួយៗទាំងអស់នោះ ប៉ុន្តែក្នុងនោះក៏មានក្រុមហ៊ុនផលិតនិងតម្លើងរថយន្តមួយចំនួនផងដែរដែលមិនបានបញ្ចេញអំពីរព័ត៌មានដែលទាក់ទងទៅនិងចំនួនទឹកប្រាក់ដែលបានដាក់ទុនវិនិយោគផងដែរ ។ 

១. ក្រុមហ៊ុន Toyota

ផ្ទាំងផ្សាយពាណិជ្ជកម្ម

ក្រុមហ៊ុន TOYOTA បានបោះទុនវិនិយោគជាទឹកប្រាក់ចំនួន ៣៦,៧លានដុល្លារ ដើម្បីសាងសង់រោងចក្រដំឡើងរថយន្តនៅ កម្ពុជាដែលមានទីតាំងស្ថិតនៅក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ, រាជធានីភ្នំពេញ។ រោងចក្រនេះបានបើកឲ្យដំណើរការកាលពីថ្ងៃទី ២ ខែឧសភា ឆ្នាំ២០២៤ ដែលរោងចក្រនេះបង្កើតការងារបានចំនួនប្រមាណ ១៥០ នាក់ជូនពលរដ្ឋ។

២. ក្រុមហ៊ុន Hyundai 

រោងចក្រដំឡើងរថយន្ដរបស់ប្រទេសកូរ៉េនេះត្រូវបានបង្កើតឡើងកាលពីឆ្នាំ ២០១១ ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសក្នុងទឹកដីខេត្តកោះកុង។ រោងចក្រនេះគឺជាការវិនិយោគរួមគ្នារវាងក្រុមហ៊ុន KH Motors និងក្រុមហ៊ុន លីយ៉ុងផាត់ (Cambodia)។ រោងចក្រនេះអាចផ្គុំដំឡើងរថយន្តបានចំនួន ៣០០០ គ្រឿងក្នុងមួយឆ្នាំដែលជាប្រភេទរថយន្ត SUV, រថយន្តច្រើនបាំង(ឡានទួរីស៍) និងប្រភេទកូនរថយន្តតូចៗ ។

៣. ក្រុមហ៊ុន International VCV Industry

កាលពីថ្ងៃទី ២៨ មិនាឆ្នាំ ២០១៨ ក្រុមហ៊ុនមួយនេះទទួលវិញ្ញាបនបត្រ័ចុះបញ្ជីជាស្ថាពរលើគម្រោងបង្កើតរោងចក្រផ្គុំនិងដំឡើងរថយន្ត។ រោងចក្រនេះមានបោះទុនវិនិយោគជាទឹកប្រាក់ប្រមាណ ៤. ០៧លានដុល្លារ ដែលអាចបង្កើតការងារបានចំនួន ៨២០ កន្លែង មានទីតាំងស្ថិតនៅភូមិទ្រុងមាន់ សង្កាត់អូរបែកក្អម (អតីតភូមទឹកថ្លា សង្កាត់ទឹកថ្លា) ខណ្ឌសែនសុខ រាជធានីភ្នំពេញ។

៤. ក្រុមហ៊ុន R M A AUTOMOTIVE (CAMBODIA) CO., LTD

រោងចក្រផ្គុំនិងដំឡើងរថយន្តដែលមានទីតាំងស្ថិតនៅផ្លូវជាតិលេខ ៥ ភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ដែលមានទុនវិនិយោគចំនួន ២១លានដុល្លារ និងអាចបង្កើតការងារបានចំនួន ៤៤១ កន្លែង។ រោងចក្រនេះត្រូវបានគេដាក់អោយបើកដំណើរការកាលពីថ្ងៃទី១៦ ខែមិថុនា ឆ្នាំ២០២២ សម្រាប់ការដំឡើង។ លើសពីនេះទៅទៀតនៅឆ្នាំ ២០២៥ នេះក្រុមហ៊ុនបានបន្ថែមទុនវិនិយោគរហូតដល់ការផលិតផ្ទាល់នៅកម្ពុជាផងដែរ។

៥. ក្រុមហ៊ុន Daehan 

ក្រុមហ៊ុននេះបានចាប់ផ្ដើមបើករោងចក្រដំឡើងរថយន្ត នៅក្រុងបាវិត ខេត្តស្វាយរៀង កាលពីថ្ងៃទី ៩ ឧសភា ២០១៨ ។ ក្រុមហ៊ុនមួយនេះបានដំឡើងរថយន្តម៉ាក Ssangyong Daehan និង Sino ដែលក្នុងមួយឆ្នាំរោងចក្រអាចដំឡើងរថយន្តខ្ទង់ ២០០០០ គ្រឿងដែលមានដូចជារថយន្ត ធនតូចលក្ខណៈគ្រួសា រថយន្តដឹកភ្ញៀវ រថយន្តដឹកឥវ៉ាន់ និងរថយន្តដឹកកម្មករជាដើមដែលសម្រាប់ផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេសផងដែរ។

៦. ក្រុមហ៊ុន EM AUTOMOBILE CO., LTD

ក្រុមហ៊ុននេះត្រូវបានក្រុមប្រឹក្សាអភិវឌ្ឍន៍កម្ពុជាអនុម័តឲ្យបង្កើតរោងចក្រផ្គុំដំឡើងគ្រឿងចក្រ រថយន្តសណ្តោង និងរថយន្តដឹកទំនិញធុនធ្ងន់គ្រប់ប្រភេទកាលពីថ្ងៃទី ១២ ខែធ្នូ ឆ្នាំ២០២១។ ដែលរោងចក្រនេះមានទីតាំងស្ថិតនៅផ្លូវជាតិលេខ ៤៨ ភូមិឈូក ឃុំជីខលើ ស្រុកស្រែអំបិល ខេត្តកោះកុង និងមានទុនវិនិយោគចំនួន ១៦,៣លានដុល្លារ ហើយអាចបង្កើតការងារបានចំនួន ៥១៥ កន្លែង។

៧. ក្រុមហ៊ុន GTV MOTOR CO., LTD

នៅថ្ងៃទី១៧ ខែមិថុនា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជាបានអនុម័តឲ្យក្រុមមួយនេះបង្កើតរោងចក្រដំឡើងរថយន្ត ដែលមានទីតាំងស្ថិតនៅអគារលេខ ៦ A និង ៦ B ផ្លូវជាតិលេ៣ ភូមិអង្រ្គង ឃុំអង្គពពេល ស្រុកគងពិសី ខេត្តកំពង់ស្ពឺ និងមានទុនវិនិយោគប្រមាណ ១៥,៦លានដុល្លារ ព្រមទាំងអាចបង្កើតការងារបានចំនួន ៧៣៨ កន្លែងផងដែរ។ ខណៈដែលរោងចក្រដំឡើងរថយន្ដមួយនេះក៏ត្រូវបានបើកដាក់ឲ្យដំណើរការនៅដើមឆ្នាំ២០២៤។

៨. ក្រុមហ៊ុន K (CAMBODIA) CO., LTD

កាលពីថ្ងៃទី១៧ ខែកុម្ភៈ ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា បានអនុម័តឲ្យក្រុមហ៊ុននេះបង្កើតរោងចក្រផ្គុំដំឡើងរថយន្ត ISUZU ដែលមានទីតាំងស្ថិតនៅភូមិសង្គ្រោះជាតិ ឃុំត្រពាំងគង ស្រុកសំរោងទង ខេត្តកំពង់ស្ពឺ និងមានទុនវិនិយោគប្រមាណ ៧,៣លានដុល្លារ ដែលអាចបង្កើតការងារបានចំនួន ១៦៦ កន្លែង។ ជាមួយគ្នានេះដែររោងចក្រដំឡើងរថយន្ដរបស់ជប៉ុននេះ ក៏ត្រូវបានដាក់ឲ្យដំណើរការកាលពីថ្ងៃទី ២៩ ខែមីនា ឆ្នាំ២០២៣ផងដែរ។

៩. ក្រុមហ៊ុន BYD 

ក្រុមហ៊ុនរថយន្ដអគ្គិសនីដ៏ធំមួយនេះបានសម្រេចវិនិយោគសាងសង់រោងចក្រដំឡើងរថយន្ដរបស់ខ្លួននៅកម្ពុជាដែលមានទីតាំងស្ថិតនៅតំបន់សេដ្ឋកិច្ចពិសេសក្រុងព្រះសីហនុ។ ក្រុមហ៊ុនបានដាក់ទុនប្រមាណ ៣២ លានដុល្លារ សម្រាប់ការសាងសង់ដែលបានបើកការដ្ឋានកាលពីអំឡុងខែមេសា ឆ្នាំ២០២៥។ បើតាមការបញ្ជាក់ពីខាងក្រុមហ៊ុន​ BYD Cambodia រោងចក្រនេះគ្រោងនឹងបញ្ចប់ការសាងសង់នៅខែតុលា និងចាប់ផ្តើមដំណើការផលិតកម្មដំឡើងរថយន្តអគ្គិសនីជាលើកដំបូងនៅកម្ពុជានាដើមខែវិច្ឆិកា ឆ្នាំ២០២៥ ខាងមុខនេះ។ ហើយនៅពេលបើកដំណើរការក្រុមហ៊ុននឹងធ្វើការដំឡើងរថយន្តចំនួន ២ ម៉ូដែលគឺ៖ រថយន្ត BYD SEALION Super Hybrid និង​ BYD ATTO 2។

១០. ក្រុមហ៊ុនរថយន្ដ Chevrolet 

នៅថ្ងៃទី១ ខែសីហា ឆ្នាំ២០២៥ ក្រុមហ៊ុន ធីអេច អូតូម៉ូធីវ មេនូហ្វេកឆឺរីង ឯ.ក (TH Automotive manufacturing) និង ក្រុមហ៊ុន ចេណឺរល ម៉ូទ័រ (General Motor) បានប្រកាសសហការគ្នានៅក្នុងការវិនិយោគទៅលើការសាងសង់រោងចក្រដំឡើងរថយន្ដដ៏ល្បីរបស់សហរដ្ឋអាមេរិក Chevrolet នៅក្នុងទឹកដីប្រទេសកម្ពុជា។ ដែលរោងចក្រនេះត្រូវបានសាងសង់ឡើងនៅក្នុងខេត្ដកំពង់ឆ្នាំងនៅលើផ្ទៃដី ១១ ហិកតា។ និងយោងតាមការបញ្ជាក់ពីក្រុមហ៊ុន គម្រោងនេះត្រូវបានវិនិយោគចំនួន ១៩ លានដុល្លារ ហើយរំពឹងថានឹងដាក់ឲ្យដំណើរការការដំឡើងរថយន្ដ នៅក្នុងត្រីមាសទី១ ឆ្នាំ២០២៦ ខាងមុខ។ ដែលនៅពេលដំណើរការរោងចក្រមួយនេះ អាចដំឡើងរថយន្ដបានចំនួន ១០ ០០០ ទៅ ១២ ០០០គ្រឿងក្នុងរយៈពេល១ឆ្នាំ។ 

ផ្ទាំងផ្សាយពាណិជ្ជកម្ម