រថយន្ត Aston Martins Volante ដែលធ្លាប់ជារបស់កីឡាករបាល់ទាត់អង់គ្លេសដ៏ល្បីឈ្មោះ David Beckham កំពុងតែត្រូវបានគេដាក់លក់ដេញថ្លៃ។
រថយន្តដែលត្រូវបានផលិតនៅក្នុងឆ្នាំ១៩៨៨ មានតួខ្លួនពណ៌ក្រហម Deep Red នេះ ត្រូវបាន David Beckham ទិញកាលពីឆ្នាំ២០០៣។ វាមានបំពាក់ស្បែកពណ៌ទឹកដោះគោនៅកាប៊ីនខាងក្នុង និងម៉ាស៊ីន V8 មានកម្លាំងដល់ ៤២៣សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៥,២វិនាទី ហើយមានល្បឿនអតិបរមាដល់ ២៧០គីឡូម៉ែត្រក្នុងមួយម៉ោង។
Beckham បានកាន់កាប់រថយន្តនេះអស់រយៈពេល ១៥ឆ្នាំ រួចក៏សម្រេចចិត្តលក់វាវិញនៅក្នុងឆ្នាំ២០១៨។ វាត្រូវបានថែទាំយ៉ាងដិតដល់ ចាប់តាំងពីផលិតថ្មីចេញពីរោងចក្រមក ហើយក៏ធ្លាប់បានបង្ហាញខ្លួននៅក្នុងកម្មវិធី 2020 London Classic Car Show កាលពីខែកុម្ភៈ ផងដែរ។
ឥឡូវក្រុមហ៊ុន Aston Martin Works បានដាក់លក់រថយន្ត Volante នេះនៅលើគេហទំព័រ AutoTrader ក្នុងតម្លៃរហូតដល់ទៅ ៥៤៨ ៨០០ដុល្លារឯណោះ៕
