ក្រុមហ៊ុនរថយន្ត Lotus បានបញ្ជាក់ពីការពន្យារពេលបញ្ចប់ការផលិតរថយន្តអគ្គិសនីម៉ូដែល Evija របស់ខ្លួន ដោយសារតែជំងឺកូវីដ១៩ ធ្វើឲ្យប៉ះពាល់ទូទាំងពិភពលោក។
រថយន្ត Evija មួយគ្រឿង ដើមឡើយរំពឹងថានឹងផលិតរួចរាល់នៅដំណាច់ឆ្នាំ ២០២០ នេះ ប៉ុន្តែដោយសារជំងឺកូវីដ១៩ និងការបិទខេត្ត/ក្រុងផងនោះ បានបង្ខំឲ្យក្រុមហ៊ុនផ្អាកការធ្វើតេស្តលើរថយន្តរបស់ខ្លួន។
លោក Phil Popham ប្រធានក្រុមហ៊ុន Lotus បាននិយាយថា ៖ “យើងបាត់បង់ពេលវេលា ៥ខែ សម្រាប់ការធ្វើតេស្ត ដែលភាគច្រើនគឺនៅក្នុងទ្វីបអឺរ៉ុប។ យើងបានខកខានការធ្វើតេស្តជាមួយធាតុអាកាសក្ដៅនៅអេស្ប៉ាញ។ រឿងនេះមិនមែនងាយស្រួលនោះទេ ដោយសារយើងត្រូវកក់ទីតាំងធ្វើតេស្ត និងត្រូវធ្វើការរង់ចាំ ដោយសារក្រុមហ៊ុនដទៃក៏ត្រូវតេស្តរថយន្តដូចគ្នា។”
ជាលទ្ធផលការដឹកជញ្ជូនរថយន្ត Evija មួយគ្រឿងដំបូងជូនអតិថិជនត្រូវអូសបន្លាយរហូតដល់អំឡុងពាក់កណ្ដាលឆ្នាំ ២០២១ ឯណោះ។ លោក Popham បានឲ្យដឹងថាមានអតិថិជនប្រមាណ ៧០នាក់ ចង់ទិញរថយន្ត Evija ដែលពួកគេសុទ្ធតែបានកក់ប្រាក់រួចរាល់ហើយ។
រថយន្ត Lotus Evija មានកំណត់ចំនួនផលិតត្រឹម ១៣០គ្រឿង ដោយនៅអង់គ្លេសវាមានតម្លៃប្រមាណ ២,២លានដុល្លារ។ រថយន្តនេះមានម៉ូទ័រអគ្គិសនីកម្លាំងដល់ ២០០០សេះ ដែលអាចស្ទុះពី ០-១០០គ.ម/ម៉ ក្នុងពេលក្រោម ៣វិនាទី និងមានល្បឿនអតិបរមា ៣២០គ.ម/ម៉៕
