[ទីផ្សារបរទេស] ក្រុមហ៊ុនរថយន្តជប៉ុន Suzuki បានបញ្ជាក់អំពីការប្ដេជ្ញារប្រកាសចេញរថយន្តអគ្គិសនីដំបូងរបស់ខ្លួននៅត្រឹមឆ្នាំ២០២៥ ដែលរថយន្តដំបូងនេះអាចនឹងប្រើប្រាស់ធាតុផ្សំសំខាន់ជាមួយរថយន្តអគ្គិសនីខា្នតតូចរបស់ Toyota។
ព័ត៌មានអំពីរថយន្តអគ្គិសនីដំបូងរបស់ Suzuki នៅមិនទាន់បានប្រកាសចេញនៅឡើយទេ ប៉ុន្តែក្រុមហ៊ុនធ្លាប់បានបង្ហាញរូបរាង Concept នៃរថយន្តអគ្គិសនីនេះនៅអំឡុងដើមឆ្នាំ២០២០កន្លងទៅ ដោយមានឈ្មោះថា Futuro-E ដែលរូបរាងរបស់វាស្រដៀងនឹងរថយន្ត Concept ថ្មីៗនេះរបស់ Toyota ដែលអាចចេញលក់ជាមួយឈ្មោះថា BZ3X។
ខណៈដែលការចុះផ្សាយមួយចំនួនបានលើកឡើងថា Suzuki អាចនឹងផលិតរថយន្តចេញពីរថយន្ត Toyota BZ4X ប៉ុន្តែរូបរាងតូចរបស់ Futuro-E របស់ Suzuki គឺស្រដៀងគ្នាទៅនឹងរថយន្តអនាគត BZ3X របស់ Toyota ទៅវិញទេ។
Suzuki តែងតែសហការយ៉ាងជិតស្និទ្ធជាមួយ Toyota ដោយក្រុមហ៊ុនទាំងពីរបានចែករំលែករថយន្តមួយចំនួននៅទីផ្សារបរទេស មានដូចជារថយន្ត Suzuki Across ដែលផលិតតាមរថយន្ត Toyota RAV4 PHEV និងរថយន្ត Suzuki Swace ដែលផលិតតាមរថយន្ត Toyota Corolla ជាដើម៕
