[ទីផ្សារបរទេស] ក្រុមហ៊ុនផលិតរថយន្ត Toyota បានធ្វើការដាក់បង្ហាញរថយន្តអគ្គិសនីសុទ្ធ Toyota bZ4X ស៊េរីថ្មី ជាផ្លូវការនិងជាលើកដំបូងនៅកម្មវិធី Bangkok International Motor Show ឆ្នាំ ២០២២ ចាប់ពីថ្ងៃទី ២៣ ខែមីនា ដល់ថ្ងៃទី ៣ ខែមេសា ឆ្នាំ២០២២ ។
សម្រាប់រថយន្តអគ្គិសនី Toyota bZ4X ដែលបានបង្ហាញលើកនេះ គឺនៅតែជារថយន្តគំរូប៉ុណ្ណោះ ដោយត្រូវបានផលិតឡើងជារថយន្តប្រភេទ SUV ខ្នាតកណ្តាលដោយប្រើប្រាស់នៅគ្រោងឆ្អឹង e-TNGA ជាមួយនឹងអាគុយលីចូម-អ៊ីយ៉ុងទំហំ ៧១,៤ គីឡូវ៉ាត់ម៉ោង និងអាចបើកបរបានចម្ងាយប្រហែល ៥០០ គីឡូម៉ែត្រក្នុងការសាកថ្មម្តង នៅក្រោមស្តង់ដារតេស្ត WLTP។ ខណៈអាគុយនេះ មានលក្ខណៈពិសេសជាមួយនឹងការខូចខាតត្រឹមតែ ១០% បន្ទាប់ពីការប្រើប្រាស់លើសពី ១០ ឆ្នាំ ឬ ២៤០,០០០ គីឡូម៉ែត្រ។
ក្នុងនោះរថយន្តអគ្គិសនីសុទ្ធ Toyota bZ4X នៅទីផ្សារអឺរ៉ុបត្រូវបានគេចេញលក់មុននេះ ដោយត្រូវបានបំពាក់ដោយម៉ូទ័រអគ្គិសនីចំនួន១ ដែលផលិតកម្លាំងបាន ២០៤ សេះ កម្លាំងរមួល ២៦៥ ញ៉ូតុនម៉ែត្រ អាចបង្កើនល្បឿនពី ០-១០០ គីឡូម៉ែត្រ/ម៉ោង ក្នុងរយៈពេល ៨,៤ វិនាទី និងមានល្បឿនអតិបរមា ១៦០ គីឡូម៉ែត្រក្នុងមួយម៉ោង។ ខណៈប្រភេទ AWD បំពាក់ជាមួយម៉ូទ័រអគ្គិសនីចំនួន២ដែលមានកម្លាំងអតិបរមា ២១៧ សេះ កម្លាំងរមួល ៣៣៦ ញ៉តុនម៉ែត្រ បង្កើនល្បឿនពី ០-១០០ គីឡូម៉ែត្រក្នុងមួយម៉ោងត្រឹមតែ ៧,៧ វិនាទីប៉ុណ្ណោះ។
គួរឲ្យដឹងថា Toyota bZ4X ប្រភេទ Crossover អគ្គិសនីនឹងត្រៀមចេញលក់លើកដំបូងក្នុងទីផ្សារប្រទេសថៃនៅចុងឆ្នាំ២០២២ ដល់ ឆ្នាំ២០២៣ ដែលមានចំនួនកំណត់មិនលើសពី១០០គ្រឿងនោះទេដែលនឹងជាប្រភេទរថយន្តប៉ុង១៕
