[ទីផ្សារបរទេស] កាលពីថ្ងៃទី១៤ ខែកក្កដា រថយន្ត Hyundai Ioniq 6 ត្រូវបានប្រកាសចេញជាផ្លូវការនៅក្នុងកម្មវិធីតាំងបង្ហាញរថយន្ត Busan International Auto Show សម្រាប់ទីផ្សារប្រទេសកូរ៉េខាងត្បូង ហើយពេលនេះតម្លៃរបស់រថយន្តត្រូវបានបង្ហើបឲ្យដឹងបណ្ដើរៗ។
នៅទីផ្សារក្នុងស្រុក រថយន្ត Ioniq 6 នឹងមានចែកចេញជាពីរប្រភេទរួមមាន Standard Range និង Long Range ដោយ Standard Range មានតម្លៃចាប់ពីប្រមាណ ៤១ ៤០០ដុល្លារ ខណៈដែល Long Range មានតម្លៃចាប់ពីប្រមាណ ៤៤ ៩០០ដុល្លារ។
ចំពោះ Standard Range មានប្រើប្រាស់ម៉ូទ័រអគ្គិសនីមួយ ដែលអាចផលិតកម្លាំងបាន ២២៨សេះ និងមានអាគុយចំណុះ ៥៣kWh អាចបើកបរបានចម្ងាយ ៣៦៧គីឡូម៉ែត្រ ចំណែកឯប្រភេទ Long Range មានម៉ូទ័រអគ្គិសនីពីរ អាចផលិតកម្លាំងបាន ៣២៥សេះ និងមានអាគុយចំណុះ ៧៧,៤kWh អាចបើកបរបានចម្ងាយ ៥២៤គីឡូម៉ែត្រ។
បន្ថែមពីនេះរថយន្ត Ioniq 6 មានបំពាក់មកជាមួយបច្ចេកវិទ្យាសាកល្បឿនលឿនដែលគាំទ្រទាំងដុំសាកកម្លាំង 400V និងកម្លាំង 800V សម្រាប់ការសាកបានចម្ងាយបើកបរ ១០០គីឡូម៉ែត្រ ក្នុងពេលត្រឹម ៥នាទី ហើយការសាកឡើងពី ១០% ឡើងដល់ ៨០% គឺប្រើពេលត្រឹម ១៨នាទីប៉ុណ្ណោះ។
រថយន្ត Hyundai Ioniq 6 នឹងចូលរោងចក្រផលិតនៅត្រីមាសទីបីនៃឆ្នាំ២០២២នេះ ជាមួយការដឹកជញ្ជូនរំពឹងថាចាប់ផ្ដើមនៅខែមករា ឆ្នាំ២០២៣ខាងមុខ៕
