កាលពីខែមករាកន្លងទៅនេះ ក្រុមហ៊ុន Subaru បានដាក់បង្ហាញគំរូរថយន្តអគ្គិសនីរបស់ខ្លួន ហើយឥឡូវនេះវាបានបញ្ជាក់ថា នឹងចេញលក់សម្រាប់ទីផ្សារអឺរ៉ុប។
ខណៈពេលដែលព័ត៌មានពាក់ព័ន្ធនឹងរថយន្តអគ្គិសនីនេះនៅមានកម្រិតនៅឡើយ ក្រុមហ៊ុន Subaru បានអះអាងថា វានឹងមានតួខ្លួនជាប្រភេទ SUV ខ្នាតមធ្យម ដែលមានទំហំស្រដៀងទៅនឹងម៉ូដែល Forester។ ក្រុមហ៊ុនរថយន្តជប៉ុននេះក៏បានបញ្ជាក់ទៀតថា វានឹងត្រូវផលិតឡើងដោយប្រើគ្រោងឆ្អឹង ដែលប្រើរួមគ្នាជាមួយ Toyota គឺ e-TNGA។ គ្រោងឆ្អឹងនេះនឹងអនុញ្ញាតឲ្យវា អាចដើរតួជារថយន្តប្រើប៉ុងមួយ និងប៉ុងពីរ។
គួរឲ្យដឹងថា SUVអគ្គិសនីរបស់ Subaru ទំនងជាត្រូវហៅឈ្មោះថា Evoltis។ ទោះជាយ៉ាងណាក៏ដោយ វាមិនទាន់មានការបញ្ជាក់ជាផ្លូវការនៅឡើយទេ។
យ៉ាងណាមិញ រថយន្ត Subaru Evoltis អាចនឹងបង្ហាញខ្លួននាឆ្នាំក្រោយ នៅក្នុងកម្មវិធី Tokyo Motor Show ហើយអាចមានចម្ងាយបើកបរដល់ ៦០០គីឡូម៉ែត្រ រាល់ពេលសាកភ្លើងពេញម្តង៕
