ក្នុងកម្មវិធីអបអរសាទរខួប ៣០ ឆ្នាំនៃ Lexus កាលពីសប្ដាហ៍កន្លងទៅ ម៉ាករថយន្តប្រណីតរបស់ជប៉ុនមួយនេះបានប្រាប់ខ្លះៗអំពីផែនការនាពេលអនាគត។ ក្នុងនោះរួមមានផែនការអំពីបច្ចេកវិទ្យារថយន្តបើកបរស្វ័យប្រវត្តិ, ចំនួនរថយន្តអគ្គិសនីចេញលើទីផ្សារ និងបន្ថែមជម្រើសអគ្គិសនីលើរថយន្តកំពុងមានស្រាប់។
លោក Koji sato អនុប្រធាននៃ Lexus International បាននិយាយថា ៖ “ជាមួយរថយន្ត Toyota និង Lexus យើងគ្រោងបញ្ចេញរថយន្តអគ្គិសនីចំនួន ១០ ម៉ូដែល នៅត្រឹមឆ្នាំ ២០២៥។ ក្នុងអំឡុងពេលជាមួយគ្នានេះ គ្រប់ម៉ូដែលរថយន្ត Lexus ដែលមានលើទីផ្សារបច្ចុប្បន្ន នឹងមានជាជម្រើសប្រភេទអគ្គិសនី បន្ថែមពីលើប្រភេទប្រើប្រេងឥន្ធនៈសព្វថ្ងៃនេះ”។
ក្នុងករណី “អគ្គិសនី” នេះ រួមបញ្ចូលការគួបផ្សំនៃប្រព័ន្ធ Hybrid, Plug-in Hybrid, អគ្គិសនីប្រើអាគុយ និងប្រភេទរថយន្តប្រើអ៊ីដ្រូហ្សែនផងដែរ ដែលវាសុទ្ធសឹងជាជម្រើសសម្រាប់រថយន្តអនាគតរបស់ Lexus។
ម៉ាករថយន្ត Lexus កំពុងស្ថិតនៅតាមផ្លូវសម្រេចគោលដៅរបស់ខ្លួន ដោយក្នុងចំណោមរថយន្ត ១១ ម៉ូដែលរបស់ខ្លួន មាន ៥ ម៉ូដែលប៉ុណ្ណោះមិនមានជម្រើសម៉ាស៊ីន Hybrid ហើយប្រព័ន្ធ Hybrid របស់ Lexus ក៏បានវិវត្តន៍កាន់តែរីកចម្រើនផងដែរ៕
