រថយន្ត Prius ស៊េរីឆ្នាំ ២០១៩ ទើបតែបានបង្ហាញខ្លួនជាផ្លូវការ នាពេលកន្លងទៅនេះ ដោយក្រុមហ៊ុន Toyota បានបន្ថែមជម្រើសប៉ុងពីរជាលើកដំបូងបង្អស់សម្រាប់រថយន្ត Hybrid មួយនេះ។
រថយន្ត Prius ប្រើប៉ុងពីរ AWD-e បានបន្ថែមម៉ូទ័រអគ្គិសនីមួយទៀត ដែលផ្តល់កម្លាំងដល់កង់ខាងក្រោយ នៅពេលត្រូវការ។ វានឹងដំណើរការនៅល្បឿនរហូតដល់ទៅ ៦៩ គីឡូម៉ែត្រក្នុងមួយម៉ោង ហើយជួយឲ្យកង់តោងស្អិតលើផ្លូវរអិលទៀតផង។
ឥឡូវនេះក្រុមហ៊ុន Toyota បានប្រើអាគុយ Hybrid ថ្មី ប្រភេទ nickel-metal ដែលធ្វើការយ៉ាងប្រសើរទោះស្ថិតនៅក្នុងសីតុណ្ហភាពត្រជាក់។ អាគុយនោះត្រូវបានដាក់នៅក្រោមកៅអីអ្នកដំណើរផ្នែកខាងក្រោយ ដែលមិនធ្វើឲ្យប៉ះពាល់ដល់ឃ្លុបខាងក្រោយ និងកន្លែងដាក់ជើងរបស់អ្នកដំណើរខាងក្រោយឡើយ។
រថយន្ត Prius AWD-e ជាមធ្យមស៊ីសាំង ៤,៧ លីត្រលើចម្ងាយផ្លូវ ១០០ គីឡូម៉ែត្រ ខណៈ Prius ប៉ុងមួយជាមធ្យមស៊ីសាំង ៤,២ លីត្រលើចម្ងាយផ្លូវ ១០០ គីឡូម៉ែត្រ។
ថ្មីៗនេះ គេហទំព័រ Edmunds បានយករថយន្ត Prius ប្រើប៉ុងមួយ FWD និងប៉ុងពីរ AWD ទៅសាកល្បងលើផ្លូវទឹកកក ដើម្បីស្វែងយល់ពីភាពខុសគ្នា។ ជាលទ្ធផលវាពិតជាខុសប្លែកគ្នាពិតមែន ចំពោះ Prius ប្រើប៉ុងមួយ និងប្រើប៉ុងពីរ៕
ចង់ដឹងយ៉ាងណា ទៅទស្សនាវីដេអូទាំងអស់គ្នា៖
