![2](https://camboauto.com/wp-content/uploads/2022/04/2-26-696x392.jpg)
ប្រសិនបើអ្នកទិញរថយន្ត Tesla ថ្មី ហើយមើលឃើញថាឃ្លុបក្រោយវារៀងទូលាយៗជាងមុនបន្តិច នោះសូមកុំភ្ញាក់ផ្អើលឲ្យសោះ ដោយសារតែក្រុមហ៊ុនផលិតរថយន្តអគ្គិសនីអាមេរិកមួយនេះ លែងដាក់ខ្សែសាកភ្លើងមកជាមួយរថយន្តទៀតហើយ។
លោក Elon Musk ដែលជា CEO ក្រុមហ៊ុន Tesla បានបញ្ជាក់ដំណឹងនេះលើបណ្តាញសង្គម Twitter ដោយអះអាងថា ការប្រើប្រាស់ខ្សែសាកភ្លើងដែលភ្ជាប់មកជាមួយរថយន្ត គឺនៅមានតិចតួច។
ជាមួយគ្នានេះ ក្រុមហ៊ុន Tesla ជឿជាក់ថា អ្នកប្រើប្រាស់ភាគច្រើនបានដំឡើងឆ្នាំងសាកជាប់ជញ្ជាំង (wallbox) នៅផ្ទះ ឬ ប្រើប្រាស់ស្ថានីយសាកភ្លើង Tesla Supercharger ខណៈឧបករណ៍សាកភ្លើងទាំង ២ ប្រភេទនេះសុទ្ធតែមានភ្ជាប់ខ្សែសាកមកស្រាប់តែម្តង។
មិនតែប៉ុណ្ណោះ លោក Musk ក៏បានលើកទឹកចិត្តឲ្យម្ចាស់រថយន្ត Tesla ដំឡើងកន្លែងសាកភ្លើងនៅផ្ទះ ប៉ុន្តែក៏បានបន្ថែមថា បើអតិថិជនចង់ទិញខ្សែសាកភ្លើង គឺអាចរកបានតាមហាងរបស់ Tesla ក្នុងតម្លៃ ២០០ដុល្លារ៕