[ទីផ្សារបរទេស] ថ្មីៗនេះក្រុមហ៊ុនផលិតរថយន្ត Lynk & Co បានធ្វើការបញ្ចេញនូវម៉ូឌែល 06 SHERO ស៊េរីឆ្នាំ ២០២២ ប្រើប្រាស់ម៉ាស៊ីន Plug-in Hybrid ជាមួយនឹងតម្លៃចាប់ពី ២៦ ៧១៣ ដល់ ១៣៩ ៧៣៧ ដុល្លារមានត្រឹមចំនួន ២៦៦ ប៉ុណ្ណោះសម្រាប់ទីផ្សារនៅក្នុងប្រទេសចិន។
សម្រាប់រថយន្ត 06 SHERO មានទំហំប្រវែង ៤ ៣៤០ មម, ទទឹង ១ ៨២០ មម និងកំពស់ ១ ៦២៥ មម និងគម្លាតកង់មុខ-ក្រោយ ២ ៥៤០ មម។ ខណៈដែលរថយន្ត 06 SHERO ទទួលបានការរចនាទ្បើងសម្រាប់មនុស្សស្រីជាមួយនឹងពណ៍ពីសេសបន្ថែម Pink Special Edition លាយគ្នាជាមួយពណ៍ផ្កាឈួក និងពណ៍ស្វាយជាដើម។ បន្ថែមពីនេះរថយន្ត 06 SHERO ក៏មានកញ្ចប់ Wild Berry Violet ផងដែរ។
រថយន្ត 06 SHERO បំពាក់ដោយជម្រើសម៉ាស៊ីនសាំង Plug-in Hybrid ចំណុះ ១,៥លីត្រ ទំហំ ៣ស៊ីទ្បាំង ផលិតកម្លាំង ២៥៨សេះ ភ្ជាប់ជាមួយប្រអប់លេខអូតូ។ បន្ថែមពីនេះវាបានបំពាក់អាគុយទំហំ ១៥,៥ គីទ្បូវ៉ាត់ម៉ោង ជាមួយនឹងការសាកភ្លើងម្តងអាចបើកជិះបានចម្ងាយ ៨៤ គីឡូម៉ែត្រ។
ក្រុមហ៊ុនផលិតរថយន្តចិន Lynk & Co បាននិយាយថាជាង ៤៥ ភាគរយៈនៃម៉ូឌែល 06 SHERO ភាគច្រើនប្រើប្រាស់ដោយនារីវ័យក្មេងទាន់សម័យចាប់តាំងពីបានដាក់លក់លើកដំបូង ជាមួយនឹងពណ៍ផ្កាឈូកថ្មីដើម្បីបំពេញតម្រូវការអ្នកប្រើបានយ៉ាងល្អ៕
