ការផលិតរថយន្តអគ្គិសនី Polestar 2 បានចាប់ផ្ដើមហើយ នៅឯរោងចក្រក្នុងតំបន់ Luqiao ភាគខាងកើតខេត្ត Zhejiang ប្រទេសចិន។
ខណៈដែលក្រុមហ៊ុនរថយន្តនៅពាសពេញប្រទេសចិនបានបិទទ្វាររោងចក្រផលិតជាច្រើនសប្ដាហ៍ដោយសារការរាតត្បាត COVID-19 ក្រុមហ៊ុន Polestar នៅតែមានការអនុវត្តតាមការកំណត់យ៉ាងខ្ជាប់ខ្ជួន ដើម្បីធានាថាប្រតិបត្តិការរបស់ខ្លួននៅចិន នឹងមិនមានរងការប៉ះពាល់។
Polestar បានចាប់ផ្ដើមការផលិត ដោយមានចេញនូវច្បាប់ត្រួតពិនិត្យយ៉ាងម៉ត់ចត់ ដូចជាការវាស់កម្ដៅ ការសម្លាប់មេរោគ និងការផ្ដល់ម៉ាស់សម្រាប់បុគ្គលិកទាំងអស់ជាច្រើន។ ការត្រួតពិនិត្យនេះហាក់មានលទ្ធផល ដោយក្រុមហ៊ុននិយាយថាមិនមានបុគ្គលិកណាម្នាក់របស់ខ្លួនមានឆ្លងវីរុសនោះទេ។
រថយន្ត Polestar 2 ដែលត្រូវផលិតដំបូងគេគឺជាប្រភេទ Launch Edition ដែលមានតម្លៃចាប់ពី ៦៣ ០០០ ដុល្លារ។ វាមានបំពាក់ម៉ូទ័រអគ្គិសនីមួយគូដែលផលិតកម្លាំងបាន ៤០២ សេះ អាចស្ទុះពី ០–១០០ គ.ម/ម៉ ក្នុងពេលមិនដល់ ៥ វិនាទី៕
