រថយន្ត Hyundai Veloster N ស៊េរីឆ្នាំ២០២១ បានឡើងថ្លៃគួរឲ្យកត់សម្គាល់ សម្រាប់ទីផ្សារសហរដ្ឋអាមេរិក ប៉ុន្តែវាមានមូលហេតុសមរម្យរបស់វា។
ឥឡូវនេះ រថយន្ត Veloster N ឆ្នាំ២០២១ មានតម្លៃចាប់ពី ៣៣ ២៤៥ដុល្លារ ថ្លៃជាងស៊េរីឆ្នាំ២០២០ សរុប ៤ ៦៧០ដុល្លារ។ អតិថិជនដែលចង់បាន Option ប្រអប់លេខអូតូ ៨វគ្គ dual-clutch ត្រូវថែមលុយ ១ ៥០០ដុល្លារទៀត សរុបឡើងដល់ ៣៤ ៧៤៥ដុល្លារ។
អ្វីដែលសំខាន់ Hyundai មិនមែនឡើងថ្លៃគ្មានមូលហេតុឡើយ។ បើប្រៀបធៀបនឹងឆ្នាំមុន គ្រប់ម៉ូដែល Veloster N ឆ្នាំ២០២១ ដែលលក់នៅអាមេរិកទាំងអស់ នឹងមានបំពាក់កញ្ចប់ Option “Performance Package” មកស្តង់ដារ ដែលជួយបង្កើនកម្លាំងពី ២៥០សេះ ទៅ ២៧១សេះ ហើយក៏បន្ថែមយ៉ាន់ទំហំ ១៩អ៊ីញ, limited-slip differential និងហ្វ្រាំងធំជាងមុន ទៀតផង។
គួរឲ្យដឹងថា កញ្ចប់ Option “Performance Package” នេះ ពីមុនមានតម្លៃដល់ទៅ ២ ១០០ដុល្លារឯណោះ។
បន្ថែមពីនេះ រថយន្ត Veloster N ថ្មី មានបំពាក់មុខងារមកស្តង់ដារជាច្រើន ដូចជា automatic emergency braking, forward collision-avoidance assist, lane following assist, lane-keeping assist, driver attention warning, blind spot collision-avoidance assist និង rear cross-traffic collision warning ផងដែរ៕
