ក្រុមហ៊ុនរថយន្ត BMW Group កំពុងចុះហត្ថលេខាលើកិច្ចព្រមព្រៀងដែលមានតម្លៃចំនួន ២៨៥ លានផោន (៣៣៤ លានដុល្លារ) ជាមួយក្រុមហ៊ុនផ្គត់ផ្គង់អាគុយលីចូម ទី២ របស់ខ្លួន។ តាមរយៈកិច្ចព្រមព្រៀងនេះ ក្រុមហ៊ុនអាមេរិក Livent នឹងផ្គត់ផ្គង់អាគុយរថយន្តទៅឲ្យក្រុមហ៊ុនផលិតរថយន្ត BMW។
ថ្វីបើ Livent មានមូលដ្ឋាននៅទីក្រុង Philidelphia សហរដ្ឋអាមេរិក ក៏ដោយ ក៏វាទទួលបានលីចូមរបស់ខ្លួនពីបឹងអំបិលនៅអាហ្សង់ទីន ក្បែរព្រំដែនជាមួយប្រទេសបូលីវី និងឈីលី។ Livent នឹងលក់ដោយផ្ទាល់ទៅក្រុមហ៊ុនផលិតអាគុយរបស់ BMW ដើម្បីឲ្យក្រុមហ៊ុនអាចតាមដាននូវការផលិតបាន។
ក្រុមហ៊ុន BMW បានជ្រើសរើសយក Livent ដែលជាអ្នកផ្គត់ផ្គង់អាគុយឲ្យក្រុមហ៊ុន Tesla ផងដែរ ដើម្បីធ្វើពិសោធកម្មមូលដ្ឋានអ្នកផ្គត់ផ្គង់របស់ខ្លួន និងដោយសារតែរបៀបនៃការទាញយកលីចូមរបស់ពួកគេ។ Livent ប្រើវិធីសាស្រ្តដែលមិនសូវប៉ះពាល់ដល់បរិស្ថាន ដើម្បីយកលីចូមពីក្នុងបឹងអំបិល។ ក្រុមហ៊ុននិយាយថា វាកាត់បន្ថយបរិមាណដីដែលត្រូវបានប្រើ ហើយទទួលបានផលច្រើនទៀតផង៕
