ក្រុមហ៊ុន Mercedes-Benz បានយកកម្មវិធីតាំងបង្ហាញរថយន្ត Shanghai Auto Show ឆ្នាំ ២០២១ ដើម្បីបង្ហាញអំពីម៉ូឌែលថ្មីៗដែលគ្រោងនឹងចេញជាច្រើន ក្នុងនោះរួមមានរថយន្ត C-Class L ២០២១ ផងដែរ។
ដូចដែលឈ្មោះបានបង្ហាញ ម៉ូដែលនេះគឺជាប្រភេទដែលមានប្រវែងកង់មុខ ដល់កង់ក្រោយវែង នៃជំនាន់ C-Class ថ្មី ហើយក្រៅពីមានទំហំផ្នែកខាងក្នុងធំទូលាយ វាក៏បង្ហាញពីការរចនាថ្មីបែប Classic សម្រាប់ប៉ាណាខាងមុខ រួមជាមួយនឹងបរិក្ខាបន្ថែមទៀតផងដែរ។
រថយន្ត C-Class L ថ្មី មិនត្រឹមតែផ្តល់នូវទំហំផ្នែកខាងក្រោយធំប៉ុណ្ណោះទេ ប៉ុន្តែថែមទាំងជួយសម្រួលដល់ការផ្តល់នូវផាសុកភាពនៅខាងក្រោយ ជាមួយនឹងកន្លែងទប់ក, ធ្នាក់ដៃធំជាងមុន មានកន្លែងទុកកែវ, រន្ធUSB, Sound-proof កាត់បន្ថយសម្លេងបានស្ងាត់ និងគ្រឿងបរិក្ខាទំនើបៗជាច្រើនបន្ថែមទៀត ។
ក្រុមហ៊ុន Mercedes-Benz ពុំបានបង្ហាញអំពីព័ត៌មានលម្អិតរបស់វិមាត្រនៃរថយន្តនោះទេ ប៉ុន្តែប្រព័ន្ធផ្សព្វផ្សាយចិនបានអះអាងថាវាមានប្រវែងតួខ្លួនសរុប ៤ ៨៨២ មីលីម៉ែត្រ, ទទឹងប្រវែង ១ ៨២០មីលីម៉ែត្រ, កម្ពស់ ១ ៤៦១ មីលីម៉ែត្រ និងប្រវែងកង់មុខ ដល់កង់ក្រោយ ២ ៩៥៤ មីលីម៉ែត្រ វែងជាង C-Class L ចាស់ប្រវែង ៨៩មីលីម៉ែត្រ។
ត្រូវបានផលិតឡើង និងសម្រាប់លក់ផ្តាច់មុខនៅក្នុងប្រទេសចិន C-Class L ឆ្នាំ២០២១ នឹងមានចំនួន ២ម៉ូឌែលគឺ C200 L បំពាក់ជាមួយម៉ាស៊ីនចំណុះ ១,៥លីត្រ កម្លាំង ១៦៨សេះ និង C260 L បំពាក់ជាមួយម៉ាស៊ីនចំណុះ ១,៥លីត្រ Mild-Hybrid កម្លាំង ២០១សេះ ឬ ២,០លីត្រ កម្លាំង ២០១សេះ។ ហើយវានឹងដំណើរការដោយប្រអប់លេខអូតូ ៩វគ្គ ខណៈពេលដែលប្រព័ន្ធ 4Matic AWD នឹងត្រូវបានកំណត់ សម្រាប់តែម៉ូឌែលខ្ពស់បំផុត(Specs ខ្ពស់)៕
