បន្ទាប់ពីមានវត្តមាននៅលើទីផ្សាររយ:ពេល ១០ឆ្នាំ រថយន្ត Ford Ranger ម៉ូឌែលបច្ចុប្បន្នគ្រោងនឹងទទួលការអភិវឌ្ឍន៍ថ្មី ជាមួយការរំពឹងថានឹងបង្ហាញវត្តមាននាឆ្នាំក្រោយ ខណ:ពេលមានរូបភាពដែលកំពុងធ្វើតេស្តនៅលើដងផ្លូវត្រូវគេប្រមាញ់បាន។
យោងតាមរូបភាពទាំងនោះ គេឃើញថាផ្នែកខាងមុននៃរថយន្ត Ford Ranger ឆ្នាំ ២០២៣ មានភាពខុសគ្នានឹងជំនាន់បច្ចុប្បន្ន ដោយវាស្រដៀងភីកអាប់ខ្នាតតូចរបស់ Ford គឺរថយន្ត Maverick ដែលទើបចេញកាលពីពេលថ្មីៗកន្លងទៅនេះ។ ប្រព័ន្ធភ្លើងបំភ្លឺខាងមុខបានប្រើជាមួយចង្កៀងប្រភេទ LED រូបរាងជាអក្សរ C រួមជាមួយប៉ាណាទំហំធំ, ចង្កៀងក្រោយថ្មី និងកាងលំអរ (Sport bar)ផងដែរ។ បន្ថែមពីនេះវាក៏នឹងទទួលបាននូវប្រព័ន្ធកម្សាន្តចុងក្រោយរបស់ Ford គឺ SYNC4 ជាមួយជម្រើសអេក្រង់ទំហំ ១២អ៊ីញ និង ១៥,៥អ៊ីញ រួមជាមួយកុងទ័របង្ហាញទំហំ ១២អ៊ីញផងដែរ។
យោយតាមទំព័រ CarExpert បាននិយាយថា រថយន្ត Ford Ranger ឆ្នាំ ២០២៣ នឹងទទួលបាននូវម៉ាស៊ីនកូនកាត់ PHEV រួមជាមួយម៉ាស៊ីនសាំង ឬម៉ាស៊ូត។ សម្រាប់ម៉ាស៊ីនសាំង ២,៣លីត្រ ផ្គួបជាមួយម៉ូទ័រអគ្គិសនីចំនួន ១ មានសម្ថភាពផលិតកម្លាំងបាន ៣៦២សេះ និងកម្លាំងបង្វិល ៦៨០ញ៉ូតុនម៉ែត្រ។ ក្រៅពីជម្រើស ២,៣លីត្រ ក៏មានជម្រើសម៉ាស៊ីនសាំង ២,៧លីត្រ និង ៣,០លីត្រ V6ផងដែរ៕
