[ទីផ្សារបរទេស] ក្រុមហ៊ុនផលិតរថយន្ត Ford នៅក្នុងប្រភេទថៃបានប្រកាសចេញលក់រថយន្ត Ranger ស៊េរីថ្មី ២០២២ ភ្លាមៗបន្ទាប់ពីការបង្ហាញខ្លួននៅលើទីផ្សារពិភពលោក ដោយមានតែម៉ូដែល Sport និង Wildtrak ប៉ុណ្ណោះដែលបានដាក់តាំងបង្ហាញនៅ Bangkok Motor Show ហើយបើកឲ្យអតិថិជនកក់ទុកតាមអ៊ីនធឺណិតតាមរយៈគេហទំព័ររបស់ Ford រួមទាំងម៉ូដែល Ranger Raptor ផ្សេងទៀតផងដែរ។
ការរចនាផ្នែកខាងក្រៅនៃរថយន្ត Ford Ranger ស៊េរីឆ្នាំ ២០២២ ថ្មី ត្រូវបានបំពាក់ជាមួយប៉ាណាមុខរចនាថ្មីភ្ជាប់ជាមួយនឹងចង្កៀងមុខរាងអក្សរ C ហើយក៏ជារថយន្តដំបូងគេសម្រាប់ក្រុមហ៊ុន Ford ដែលបំពាក់ចង្កៀងមុខប្រភេទ Matrix LED និងឈ្នាន់ជើងនៅផ្នែកខាងក្រោយផងដែរ ជាភាពងាយស្រួលនៃការឡើងលើទ្រុងក្រោយ ដោយត្រូវបានបំពេញបន្ថែមដោយគន្លាតកង់មុខ-ក្រោយ ដែលមានប្រវែង ៥០ ម.មនិងធំទូលាយជាងមុន។
ចំពោះផ្នៃខាងក្នុងនៃសង្កត់ធ្ងន់លើការតុបតែងបន្ថែមភាពប្រណីតថែមទៀត ដោយបានបំពាក់នៅកុងទ័រព័ត៌មានឌីជីថលថ្មីស្រឡាងទំហំ ៨ អ៊ីញ អេក្រង់បញ្ឈរ touchscreen ទំហំ ១០,១ អ៊ីញ ដល់ ១២ អ៊ីញដែលភ្ជាប់ទៅកាំមេរ៉ា ៣៦០ ដឺក្រេ ព្រមទាំងប្រព័ន្ធប្រតិបត្តិការ SYNC 4A ជំនាន់ចុងក្រោយ ភ្ជាប់ជាមួយមុខងារ Apple CarPlay/Android Auto គាំទ្រជាមួយឧបករណ៍បំពងសំឡេង ៦ចំនុច ។
លើសពីនេះ រថយន្ត Ford Ranger ស៊េរីឆ្នាំ ២០២២ ថ្មីនេះ ក៏ត្រូវបានបំពាក់ដោយរន្ធសាកភ្លើង AC នៅផ្នែកខាងក្រោយ ដោយអាចផ្គត់ផ្គង់ថាមពលរហូតដល់ ៤០០ វ៉ាត់ ដែលធ្វើឲ្យកាន់តែងាយស្រួលក្នុងការដំណើរការចរន្តអគ្គិសនីគ្រាន់តែដោតវាទៅក្នុងឡានប៉ុណ្ណោះ។
ចូលទៅកាន់ផ្នែកម៉ាស៊ីនវិញ រថយន្ត Ford Ranger ស៊េរីឆ្នាំ ២០២២ ថ្មីទាំងម៉ូដែល Sport និង Wildtrak មានទាំងម៉ាស៊ីនម៉ាស៊ូតចំណុះ ២,០ លីត្រ Turbo ប្រអប់លេខដៃ ឬប្រអប់លេខអូតូ ៦វគ្គ និងម៉ាស៊ីនម៉ាស៊ូតចំណុះ ២,០ លីត្រ Bi-Turbo បញ្ជូនថាមពលទៅកាន់ប្រអប់លេខអូតូ ១០វគ្គ ជាមួយនឹងរបៀបបើកបរចំនួន ៦ ដើម្បីជ្រើសរើសដូចជា៖ normal, economy, towing & truck , slippery road, mud និង sand។
គួរបញ្ជាក់ផងដែរថា សម្រាប់ពណ៌តួខ្លួនខាងក្រៅប្រភេទម៉ូដែល Sport version មាន ៥ពណ៌រួមមាន៖ ពណ៌ទឹកប្រាក់ (Silver Aluminum Metallic), ពណ៌ប្រផេះ (Meteor Gray), ពណ៌ខ្មៅ (Black Absolute Black), ពណ៌ស (White arctic white) និងពណ៌ទឹកក្រូច (Orange Sedona Orange) ដោយមានតម្លៃចាប់ពី ២៧ ៦៤០ ដុល្លារ។
ចំណែកសម្រាប់ពណ៌តួខ្លួនខាងក្រៅប្រភេទម៉ូដែល Wildtrak model មានចំនួន ៦ពណ៌រូមមាន៖ ទឹកប្រាក់ (Silver Aluminum Metallic), ពណ៌ប្រផេះ (Meteor Gray), ពណ៌ខ្មៅ (Black Absolute Black), ពណ៌ទឹកក្រូច (Orange Sedona Orange), ពណ៌ស (White snowflake white pearl) និងពណ៌លឿង (Yellow lux yellow) ដោយមានតម្លៃចាប់ពី ២៩ ៧២២ ដុល្លារ៕
