[ទីផ្សារបរទេស] កាលពីពេលថ្មីៗនេះ កន្លងទៅ ក្រុមហ៊ុនផលិតរថយន្ត Honda បានបញ្ចេញរូបភាព teaser របស់ HONDA HR-V ស៊េរីឆ្នាំ ២០២៣ សម្រាប់ទីផ្សារអាមេរិកខាងជើង ជាមួយនឹងការរចនាកាន់តែទាក់ទាញ មុននឹងចេញលក់ជាផ្លូវការនៅថ្ងៃទី ៤ ខែមេសា ឆ្នាំ ២០២២ ខាងមុខនេះ។
តាមរូបភាព Teaser បានបង្ហាញពីចង្កៀងភ្លើងខាងក្រោយរបស់ HR-V ជំនាន់ថ្មីរបស់សហរដ្ឋអាមេរិក ប្រភេទ LED រាងអក្សរ U ជាមួយនឹងភ្លើងស៊ីញ៉ូ LED ខាងក្រោយ ជាពិសេសប៉ាណាមុខស្រដៀងទៅនឹងរថយន្ត FORD Escape ។
ជាមួយគ្នានេះ Honda អបអរឆ្នាំថ្មីដោយបង្ហាញរូបភាពនៃ HR-V ស៊េរីឆ្នាំ ២០២៣ ដែលគ្រោងនឹងចេញលក់នៅចុងឆ្នាំ ២០២២ នឹងមកជាមួយនឹងរូបរាងកាន់តែស្ព័រ ហើយលក់តែក្នុងទីផ្សារអាមេរិកខាងជើងប៉ុណ្ណោះ ដោយជាក់ស្តែងម៉ូដែលបែបនេះ គឺខុសគ្នាទាំងស្រុងពីប្រភេទទីផ្សាសកលដែលដាក់លក់នៅប្រទេសជប៉ុនក្នុងឆ្នាំ ២០២១។
គួរឲ្យដឹងថា HONDA មិនទាន់បានផ្តល់ព័ត៌មាននៅឡើយទេ អំពីផ្នែកម៉ាស៊ីន ប៉ុន្តែគេរំពឹងថានឹងមកជាមួយម៉ាស៊ីនសាំងចំណុះ ២,០ លីត្រ ទំហំ ៤ស៊ីឡាំង hybrid ឬចំណុះ ១,៥ លីត្រ។
ទន្ទឹមនឹងនេះ រថយន្ត HR-V គឺជាគំរូរថយន្តដ៏លេចធ្លោមួយសម្រាប់ក្រុមហ៊ុន Honda ចាប់តាំងពីក្រុមហ៊ុនបានលក់រថយន្តចំនួន ១៣៧,០៩០ គ្រឿងនៅសហរដ្ឋអាមេរិកកាលពីឆ្នាំមុន និងគឺជារថយន្តប្រភេទ Crossover ដែលលក់ដាច់បំផុតទីបី ដែលប្រកួតប្រជែងជាមួយ Chevrolet Trailblazer និង Subaru Crosstrek៕
