Huawei ដែលជាក្រុមហ៊ុនបច្ចេកវិទ្យាយក្សរបស់ចិន បានបង្ហាញរូបភាព និងលក្ខណៈពិសេសនៃរថយន្ត Stelato S9T ប្រភេទ Wagon ដំបូងបង្អស់របស់ម៉ាកយីហោ HIMA (Harmony Intelligent Mobility Alliance)។ រថយន្តនេះត្រូវបានគេរំពឹងថានឹងចូលទីផ្សារក្នុងខែកញ្ញា ឆ្នាំ ២០២៥។
ម៉ាកយីហោ HIMA (Harmony Intelligent Mobility Alliance) ជាសម្ព័ន្ធភាពផ្តួចផ្តើម និងដឹកនាំដោយក្រុមហ៊ុន Huawei ។ រថយន្ដស្ថិតក្រោមបុត្រសម្ព័ន្ធ HIMA បច្ចុប្បន្នរួមមាន Aito, Luxeed, Maextro និងការបន្ថែមចុងក្រោយបំផុតគឺ Shangjie។ រថយន្ត Stelato S9T ផ្ដល់ជូនជាជម្រើសប្រើប្រាស់អគ្គិសនីសុទ្ធ (BEV) និងអគ្គិសនីលាយសាំង (PHEV) Plug-in Hybrid Electric Vehicle ខណៈម៉ូឌែលអគ្គិសនីសុទ្ធមានរយៈចម្ងាយបើកបរ ៨០១គីឡូម៉ែត្រ។
Stelato S9T មានប្រវែងតួខ្លួនសរុប ៥ ១៦០មម ទទឹង ២ ០០៥មម កម្ពស់ ១ ៤៩២មម និងប្រវែងគម្លាតកង់មុខក្រោយ ៣ ០៥០មម។ រថយន្តនេះផ្ដល់ជូនជាជម្រើសប្រើប្រាស់បុងមួយនិងបុងពីរ ទាំងម៉ូឌែលប្រើប្រាស់អគ្គិសនីសុទ្ធ (BEV) និងអគ្គិសនីលាយសាំង (PHEV) ។
ខាងក្រោមនេះជាកម្រិតសមត្ថភាពរបស់រថយន្ដ Huawei Stelato S9T
- ម៉ូឌែលប្រើអគ្គិសនី
- បំពាក់មកជាមួយអាគុយ NMC ទំហំ ១០០ kWh របស់ក្រុមហ៊ុន CATL ។
- ម៉ូឌែលប្រើបុងមួយ RWD ដំណើរដោយម៉ូទ័រអគ្គិសនីចំនួន១ នៅផ្នែកខាងក្រោយអាចផលិតកម្លាំង បាន ២២៧ kW សាកថ្មមួយពេញ អាចបើកបរបានចម្ងាយ ៨០១គីឡូម៉ែត្រ គិតតាមស្ដង់ដារវាស់ចម្ងាយ CLTC ។
- ម៉ូដែលប្រើបុងពីរ AWD ដំណើរដោយម៉ូទ័រអគ្គិសនីចំនួន២ ម៉ូទ័រអគ្គិសនីផ្នែកខាងក្រោយអាចផលិតកម្លាំង បាន ២២៧ kW ម៉ូទ័រអគ្គិសនីនៅខាងមុខអាចផលិតកម្លាំងបាន ១៥៨kW អាចបើកបរបានចម្ងាយ ៧២១គីឡូម៉ែត្រ គិតតាមស្ដង់ដារវាស់ចម្ងាយ CLTC។
- ម៉ូឌែលប្រើអគ្គិសនីលាយសាំង (EREV)
- ម៉ូដែល EREV (Extended-Range Electric Vehicle) ផ្ដល់ជូនមកជាមួយជម្រើសអាគុយ LFP ទំហំ ៣៧ kWh និង NMC ទំហំ ៥៣.៤ kWh ប្រើអគ្គិសនីសុទ្ធអាចបើកបានចម្ងាយ ៣៥៤គីឡូម៉ែត្រ ប៉ុន្តែបើប្រើអគ្គិសនីលាយសាំងអាចបើកបរបានចម្ងាយ ១ ៣០៥គីឡូម៉ែត្រ។ រថយន្ដដំណើរដោយម៉ាស៊ីនភ្លើង ICE ចំណុះ ១.៥ លីត្រ រួមបញ្ចូលជាមួយម៉ូទ័រអគ្គិសនិអាចផលិតកម្លាំង ១១៨kW។
រថយន្ដទាំង២ម៉ូឌែលនេះនឹងបំពាក់មកជាមួយប្រព័ន្ធជំនួយការបើកបរចុងក្រោយបំផុតរបស់ Huawei គឺប្រព័ន្ធ ADS 4.0 គាំទទ្រឧបករណ៍ចាប់សញ្ញា ៣២គ្រាប់ រួមមាន Lidar ចំនួន ៤ (រួមទាំង Lidar ១៩២ ខ្សែរបស់ Huawei) Radar រលកមីល្លីម៉ែត្រ 4D ចំនួន ៥ កាមេរ៉ាខាងក្រៅ ១១គ្រាប់ និង Radar Ultrasonic ១២គ្រាប់នៅជុំវិញរថយន្ដ៕
