ក្រុមហ៊ុន Audi បានប្រកាសចេញរថយន្ត R8 ស៊េរីឆ្នាំ២០២២ ជាផ្លូវការ ដោយឥឡូវនេះបានយកម៉ូដែល R8 V10 Performance RWD ធ្វើជា Base Model វិញសម្រាប់ត្រកូលរថយន្តនេះ។
រថយន្ត Audi R8 V10 Performance RWD បំពាក់ម៉ាស៊ីន naturally-aspirated ចំណុះ ៥,២លីត្រ ទំហំ ១០ស៊ីឡាំង មានកម្លាំងសរុបដល់ ៥៦២សេះ និងកម្លាំងរមួល ៥៥០ញ៉ូតុនម៉ែត្រ ដែលធ្វើឲ្យវាខ្លាំងជាងស៊េរីមុន ៣០សេះឯណោះ។ វាដំណើរការជាមួយនឹងប្រអប់លេខអូតូ ៧វគ្គ និង ប៉ុងមួយវិលកង់ក្រោយ។
រថយន្តស្ព័ររបស់អាល្លឺម៉ង់នេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៧វិនាទី សម្រាប់ម៉ូដែលតួខ្លួន Coupé និង ៣,៨វិនាទី សម្រាប់ម៉ូដែលតួខ្លួនបើកដំបូលបាន Spyder ខណៈល្បឿនអតិបរមាវិញគឺ ៣២៩ និង ៣២៧គីឡូម៉ែត្រក្នុងមួយម៉ោង។
គួរឲ្យដឹងថា រថយន្ត Audi R8 ត្រូវបានផលិតនៅរោងចក្រ Böllinger Höfe Factory ក្នុងទីក្រុង Neckarsulm ប្រទេសអាល្លឺម៉ង់ ជាមួយនឹងរថយន្តប្រណាំង R8 LMS GT4។
យ៉ាងណាមិញ រថយន្ត Audi R8 V10 Performance RWD Coupé ត្រូវបានដាក់លក់ក្នុងតម្លៃចាប់ពី ១៧២ ១៩០ដុល្លារ ក្នុងប្រទេសអាល្លឺម៉ង់ ខណៈម៉ូដែល Spyder មានតម្លៃថ្លៃជាងបន្តិច គឺចាប់ពី ១៨៧ ២១០ដុល្លារ៕
